कहल जाइत अछि त्रेतायुगमे देवता लोकनिक आग्रह पर ब्रह्मजी नृत्य वेदक निर्माण कयने छलाह। तहियासँ नृत्यक उत्पत्ति विश्वमे मानल जाइत अछि। सामवेद, अथर्ववेद, यजुर्वेद आ ऋग्वेदक बहुत रास बात एहि नृत्य वेदमे शामिल कयल गेल। नृत्य एकटा सशक्त अभिव्यक्ति अछि जे पृथ्वी आ आकाशक संग संवाद करैत अछि। हमर खुशी हमर डर आर हमर आकांक्षाकेँ व्यक्त करैत अछि। हाल केर एगो अध्ययनक अनुसार नृत्य चाहे जाहि भी प्रकार केर होय, लोकमे शारीरिक गतिविधि बढ़ाबै छै।आर ओकर संबंधमे सुधार करैत छै । लीड्स विश्वविद्यालयमे कयल गेल ई अध्ययनसँ पता चलैत अछि कि नियमित रूपसँ नृत्य आर नृत्य कक्षामे भाग लेलासँ लोकक समग्र स्वास्थ्य पर सकारात्मक प्रभाव पड़ैत अछि। एहिसँ शरीरक लचीलापन बढ़ैत अछि, जाहिसँ चोटक खतरा कम भऽ जाइत अछि। शारीरिक गतिविधिक कमी लोककेँ गैर-संक्रामक बीमारी आ मृत्युक खतरा बढ़बैत अछि। नाचलासँ चिंता आ मनोदशामे बदलावक लक्षण सेहो कम भऽ जाइत अछि। नृत्यकेँ नियमित अभ्यास सेहो हृदयक धमनीकेँ संकुचित नहिं होबय दैत अछि। हमर गुरु जी कहैत छथि जे नृत्य सुन्दर हेबाक चाही, आँखिकेँ शांतिक अनुभव कराबयवाला हेबाक चाही, अपन संस्कृतिसँ संबंधित हेबाक चाही, शास्त्रीय नृत्य आ लोक नृत्य एहने नृत्य अछि। जेना अपन मिथिलाक लोक नृत्य झिझिया, सामा चकेवा, जाट जटिन, मुदा ई सब आब धीरे-धीरे विलुप्त भऽ रहल अछि। सहरसा पंचवटी चौक निवासी रोहित झा पूनम झा आ संदीप झा’क बेटा छथि आ बालिका उच्च माध्यमिक विद्यालय, परडी, चैनपुरमे नवनियुक्त नृत्य शिक्षक छथि। हुनकर कथक नृत्यमे प्रारंभिक शिक्षा स्थानीय शशि सरोजनी रंगमंच सेवा संस्थानसँ शुरू भेल छल। नृत्य प्रशिक्षणक प्रारंभिक चरणमे हुनक प्रतिभासँ प्रभावित भऽ कऽ हुनका आरटी राजन युवा पुरस्कार देल गेल। सहरसाक बाहर गुरु नीलम चौधरी, सुब्रोतो पंडित, ममता महाराज, दुर्गा आर्य सन प्रसिद्ध नृत्य गुरु सेहो हुनका नृत्य प्रशिक्षण देलनि । पद्म विभूषण पं. बीरजू महाराज जीक कार्यशालामे चयनित भऽ हुनका कथक नृत्यक विशेष चालि सीखबाक अवसर सेहो प्राप्त भेल। गुरु शिष्य परम्पराक तहत राष्ट्रीय कथक केंद्र नई दिल्ली केर सुप्रसिद्ध कथक गुरु श्रीमती मालती श्यामक मार्गदर्शनमे साधनारत छथि। वर्तमानमे शिक्षा विभाग सहरसामे अपन सेवा प्रदान कऽ रहल छथि।
