पुलिसक पुनर्वास नीतिसँ प्रभावित सभ नक्सली
*
रायपुर समदिया
*
छत्तीसगढ़क उग्रवाद प्रभावित बीजापुर जिलामे मंगलदिन छह महिला सहित ३० नक्सली सुरक्षा बलक समक्ष आत्मसमर्पण कयलक। पुलिस अधिकारी सभक कहब अछि जे एहिमेसँ नौ गोटे पर ३९ लाख रूपयाक नकद इनाम छल। ओ कहलनि जे सभ पुलिस आ केन्द्रीय रिजर्व पुलिस बल (सीआरपीएफ)क वरिष्ठ अधिकारीक समक्ष आत्मसमर्पण कयलक।
नक्सलीक कहब अछि जे ओ माओवादीक “खोखला” विचारधारासँ हताश छथि आ पुलिसक पुनर्वास नीतिसँ प्रभावित छथि। अधिकारी लोकनि कहलनि जे आत्मसमर्पण करयवला 30 लोकमे मित्की काकेम उर्फ सरिता (35), मुरी मुहंदा उर्फ सुखमती (32) सेहो शामिल छल। दुनू गोटे पर आठ लाख रुपयाक इनाम छल। ओ कहलनि कि आन नक्सली रजिता वेट्टी (24), कोवासी (24) आ आयता सोढ़ी (22) तथा सीनू पदम (27) पर पांच-पांच लाख रुपया के इनाम छल।
अधिकारी सभ कहलनि कि आत्मसमर्पण करय बला आन नक्सली मुन्ना हेमला (35), आयतु मिडियम (38) आ आयतु कारम (50) केर माथ पर एक-एक लाख रुपयाक इनाम छल। ओ कहलनि जे आत्मसमर्पण कयनिहार नक्सली पूर्वमे सुरक्षा बल पर हमला सहित कतेको हिंसक घटनामे शामिल छल। अधिकारी सभ कहलनि जे आत्मसमर्पण करय बला सभ नक्सलीकेँ 25,000 रुपया नकद देल गेल। सभ लोकनिकेँ सरकारक पुनर्वास नीतिक अन्तर्गत सहायता देल जायत। ओ कहलनि जे एहिसँ एहि साल सुरक्षा बलक समक्ष आत्मसमर्पण करयवला नक्सलीक संख्या 76 भऽ गेल।
