बिहारक वरिष्ठ आईएएस अधिकारी केके पाठक शिक्षा विभागक प्रभार सम्हारैत रहताह या ओ एहि दायित्वकेँ अलविदा कहबाक मूडमे छथि ? ई सवाल बिहारक शिक्षा विभाग आ शिक्षकमे बहुत दिनसँ लगातार उठि रहल अछि।
वास्तवमे केके पाठक आब ३१ जनवरी तक छुट्टीक लेल आवेदन कयने छथि, जे पहिने १६ जनवरी तक छल, एहन स्थितिमे आशंका अछि जे केके पाठक आब शिक्षा विभागक प्रभार लेबा लेल तैयार नहिं छथि। मुदा, जँ सूत्रक मानल जाय तँ सरकार एखन धरि केके पाठकक छुट्टी पर जयबाक आवेदन स्वीकार नहिं कयलक। शिक्षा विभागसँ जुड़ल सूत्रक अनुसार आब मुख्यमंत्री नीतीश कुमार आ केके पाठकक मध्य बात विमर्श होयब संभव अछि।
केके पाठक बृहस्पति दिन बिहारक मुख्यमंत्री नीतीश कुमारक निवास पर जा सकैत छथि। एम्हर विभागसँ जुड़ल एकटा आओर खबर अछि जे जँ केके पाठक आबय वला दिनमे शिक्षा विभागक प्रभार नहिं सम्हारैत छथि तऽ बिहार सरकारक एकटा वरिष्ठ आईएएस अधिकारी अरविंद चौधरी वा संदीप पोंडरिककेँ शिक्षा विभागक अपर मुख्य सचिवक जिम्मेदारी देल जा सकैत अछि।
एहनमे मानल जा रहल अछि जे केके पाठकक मुख्यमंत्रीक संग भेंट आ हुनकर मना केर बाद सामान्य प्रशासन विभाग द्वारा कोनो समय अधिसूचना जारी कयल जा सकैत अछि। सबहक नजरि एहि बात पर अछि जे केके पाठक अगिला डेग की लैत छथि।
