केन्द्रीय गृह मंत्री अमित शाह पश्चिम बंगालक बनगाँवमे एकटा जनसभाक दौरान एकटा पैघ दावा कयलनि। ओ कहलनि जे चारि चरणक मतदान पूरा भऽ चुकल अछि। ३८० सीटक लेल चुनाव पूरा भऽ चुकल अछि। बंगालमे १८ सीटक चुनाव पूरा भऽ चुकल अछि। आइ हम अहाँकेँ बता रहल छी जे ३८० मे सँ पीएम मोदी २७० सीट जीति कए पूर्ण बहुमत प्राप्त कऽ चुकलाह। आगाँक लड़ाई ४०० केर पार करए केर अछि।
ओ कहलनि जे ममता बनर्जी झूठ बोलि रहल छथि कि, जे कियो सीएएक अन्तर्गत नागरिकताक लेल आवेदन करत, ओकरा कष्ट होयत। हम एतय मतुआ समुदायक लोकसभकेँ आश्वस्त करबाक लेल आयल छी जे केकरो कोनो कठिनाईक सामना नहिं करय पड़त। अहांकेँ नागरिकता सेहो भेटत आ अहाँ देशमे सम्मानक संग सेहो रहि सकब। दुनियाक कोनो शक्ति हमर शरणार्थी भाइ सभकेँ भारतक नागरिक बनबासँ नहिं रोकि सकैत अछि, ई श्री नरेन्द्र मोदी जीक वचन अछि।
ओ कहलनि “एतय (बंगालमे) बहुत रास कटमनी, घुसपैठ, बम विस्फोट आ सिंडिकेट राज अछि। ममता दीदी एकरा बंद नहिं कऽ सकैत छथि, केवल मोदीजी एकरा बंद कऽ सकैत छथि। चिटफंड घोटाला वाला, शिक्षक भर्ती घोटाला वाला, नगरपालिका भर्ती घोटाला वाला, राशन घोटाला वाला, गाय आ कोयला तस्करी करयवाला आ पैसा लऽ कऽ सवाल करय वालाकेँ जेल जयबाक तैयारी कऽ लेबाक चाही। ककरो छोड़ल नहिं जाएत।
