मुख्यमंत्री ममता बनर्जी बुधदिन कहलनि जे ओ अपन मन बना लेलनि, ओ कहलनि जे एहि साल पश्चिम बंगालमे असगर लोकसभा चुनाव लड़बाक इरादा अछि, किएक तँ कांग्रेस नेतृत्व विपक्षी गुट इंडिया ब्लॉकमे हमर सभटा प्रस्तावकेँ खारिज कऽ देलक।
वर्धमानमे प्रशासनिक समीक्षा बैसारमे भाग लेबासँ पहिने पत्रकारसँ बातचीत करैत मुख्यमंत्री कांग्रेस नेता राहुल गाँधीपर पश्चिम बंगालमे न्याय यात्राक कार्यक्रमक विषयमे कथित रूपसँ जानकारी नहिं देबाक लेल तीक्ष्ण हमला कयलनि।
“गठबंधनक लेल हमरा पश्चिम बंगालमे न्याय यात्राक कार्यक्रमक जानकारी देल जा सकैत छल। मुदा हमरा किछु नहिं कहल गेल।”
ओ कहलनि जे कांग्रेसकेँ ३०० सीट पर चुनाव लड़बाक आ शेष सीट अन्य क्षेत्रीय दलक लेल छोड़बाक प्रस्ताव देल गेल छल। आब हम क्षेत्रीय दल संग लोकसभा चुनाव खतम भेलाक बादे आगू निर्णय लेब, क्षेत्रीय दल एकजुट रहत।
मुख्यमंत्री १९ जनवरीकेँ पार्टीक प्रशासनिक समीक्षा बैसारमे तृणमूल कांग्रेसक संगठनात्मक बैसारमे नवीनतम संकेत देलनि, जखन ओ कहलनि जे हुनकर पार्टी सभ ४२ लोकसभा सीटसँ उम्मीदवार उतारबाक लेल तैयार अछि।
एम्हर पश्चिम बंगाल कांग्रेसक अध्यक्ष आ पाँच बेर लोकसभा सदस्य अधीर रंजन चौधरी सेहो मुख्यमंत्रीक खिलाफ अपन हमला जारी रखलनि। चौधरी ममता बनर्जीकेँ आगामी लोकसभा चुनावमे हुनकर विरुद्ध चुनाव लड़बाक चुनौती सेहो देलनि।
सीपीआई (एम) पोलित ब्यूरोक सदस्य आ पश्चिम बंगालमे पार्टीक राज्य सचिव मोहम्मद सलीमकेँ पश्चिम बंगालसँ गुजरय वला न्याय यात्रा रैलीमे भाग लेबाक लेल आमंत्रित कयल गेल अछि।
पश्चिम बंगालक मुख्यमंत्री ममता बनर्जीक बयान पर प्रतिक्रिया दैत कांग्रेस महासचिव (संचार) जयराम रमेश कहलनि, “ममता बनर्जीक बयान अछि जे हम भाजपाकेँ हराबय चाहैत छी। ई एकटा लम्बा यात्रा अछि। कखनो स्पीड ब्रेकर रास्तामे अबैत अछि, कखनहु हरियर बत्ती अबैत अछि। तृणमूल कांग्रेस इंडिया गठबंधनक एकटा बहुत महत्वपूर्ण स्तम्भ अछि। ममता बनर्जीक बिना हम इंडिया गठबंधनक कल्पना नहिं कए सकैत छी। किछु राह अवश्य भेटत।
