पंजाबमे इंडिया गठबन्धनकेँ झटका लागल। पंजाबक मुख्यमंत्री भगवंत मान कांग्रेसक संग गठबंधनक अटकलकेँ दरकिनार करैत कहलनि जे ओ पंजाबमे सभटा १३ सीटपर असगर चुनाव लड़ताह।
कांग्रेस आ आम आदमी पार्टी राष्ट्रीय स्तर पर गठबंधन केलक। एकर अतिरिक्त गुजरात आ दिल्लीमे सेहो सीट पर सहमति बनल अछि। पंजाबमे आम आदमी पार्टीक पैघ बहुमतक सरकार अछि। एहन स्थितिमे लोकसभा चुनाव एक संग लड़बा पर कोनो सहमति नहिं अछि।
फलतः पंजाब आम आदमी पार्टी सेहो राज्यक सभ लोकसभा सीट पर असगर चुनाव लड़बाक तैयारी शुरू कऽ देलक। किछु दिन पहिने मुख्यमंत्री भगवंत मान सभ १३ सीट पर चुनाव लड़बाक लेल बयान देने छलाह। ई बयान एहन समयमे आयल अछि जखन दिल्लीमे कांग्रेस आ आप आलाकमान पंजाब पर सहमति नहिं बना सकल।
पंजाब कांग्रेस सेहो एहि लेल बेसी आशावान नहिं अछि,
पंजाब कांग्रेस सेहो आपक संग गठबंधनसँ सहज नहिं अछि। पार्टी चण्डीगढ़क पंजाब कांग्रेस भवनमे एकटा वार रूम आ राज्य स्तरीय समितिक गठन कयलक अछि, जे राज्यभरिमे बूथ स्तर धरि नेतासभक संग सीधा समन्वय कऽ चुनाव रणनीति तैयार करत।
एहिसँ पहिने राज्य कांग्रेस १३टा क्षेत्रमे लोकसभा समन्वयककेँ तैनात कयने छल, जिनका लोकसभा निर्वाचन क्षेत्र स्तर पर स्थानीय नेता आ कार्यकर्तासभक संग समन्वयक काज सौंपल गेल अछि। पंजाब कांग्रेसक नवगठित वार रूममे पार्टी सेवानिवृत्त आईएफएस अधिकारी एचएस किंगरा, राजवंत राय शर्मा, युवा कांग्रेसक महासचिव अमन स्लैच, कुलजीत सिंह बेदी आ जंगप्रीत सिंहकेँ नियुक्त कयलक अछि। वार रूमक डिजिटलीकरणक काज सेहो शुरू कयल गेल अछि, जकर अन्तर्गत डाटा इंटेलिजेंस यूनिट, पॉलिटिकल इंटेलिजेंस यूनिट, ग्राउंड कैंपेन टीम, फील्ड मैनेजमेंट टीम, सोशल मीडिया मैनेजमेंट टीमक गठन कयल जायत।
