प्रधानमंत्री नरेन्द्र मोदी रविदिन वर्ष २०२३क अपन अन्तिम ‘मन की बात’ कार्यक्रमकेँ सम्बोधित करैत अयोध्याक भव्य राम मन्दिरक सेहो उल्लेख कयलनि। ‘मन की बात’क १०८म कड़ी केँ अपन लेल बहुत खास बताबैत पीएम मोदी कहलनि, “अयोध्यामे राम मंदिरक पूरा देशमे उत्साह आ उमंग अछि। लोक अपन भावना अलग-अलग तरीकासँ व्यक्त कए रहल छथि। अहां जरूर देखलहुं जे पिछला किछु दिनमे श्रीराम आ अयोध्याक बारेमे कतेको नव गीत आ भजन बनल अछि। कतेको लोक नव कविता सेहो लिखि रहल छथि। एहिमे पैघ अनुभवी कलाकार सेहो छथि, आ नव उभरैत युवा मित्र लोकनि सेहो मनमोहक भजनक रचना कयने छथि। हम अपन सोशल मीडिया पर किछु गीत आ भजन सेहो साझा कयने छी। एहन लगैत अछि जे कला जगत अपन अद्वितीय शैलीमे ऐतिहासिक क्षणक भागीदार बनि रहल अछि।”
लोकसभसँ हैशटैग ‘श्री रामभजन’क सङ्ग अपन रचना साझा करबाक आग्रह करैत पीएम मोदी आगू कहलनि, “एकटा बात हमर मोनमे आबि रहल अछि जे, की हम सब एहन सब रचना केल एकटा कॉमन हैशटैग के संग साझा करी। हमर निवेदन अछि जे अहाँसभ अपन रचनाकेँ सोशल मीडिया पर हैशटैग ‘श्रीराम भजन’क संग साझा करू। ई संकलन भावना आ भक्तिक एहन प्रवाह बनत जाहिमे सभगोटे राममय भऽ जायब”
‘मन की बात’ कार्यक्रमक १०८म कड़ी केँ अपना लेल विशेष बताबैत प्रधानमंत्री मोदी कहलनि जे आइ हमर साझा यात्राक १०८म कड़ी अछि। अपना सभ ओतय १०८ संख्याक महत्व आ एकर शुद्धता गहन अध्ययनक विषय अछि। मालामे १०८ मनका, १०८ बेर जप, १०८ दिव्य क्षेत्र, मन्दिरमे १०८ सीढ़ी, १०८ घंटी, १०८ केर ई अंक अपार आस्थासँ जुड़ल अछि। अतः मन की बातक १०८म कड़ी हुनका लेल बेसी विशेष भऽ गेल अछि।
प्रधानमंत्री मोदी वर्ष २०२३ मे भारत द्वारा प्राप्त कैकटा उपलब्धिक उल्लेख कयलनि आ देशवासीकेँ नव वर्षक शुभकामना देलनि। ओ देशवासीसँ नव वर्ष २०२४मे २०२३क समान भावना आ गति बनाकऽ रखबाक आह्वान सेहो कयलनि।
प्रधानमंत्री कहलनि “ई १४० करोड़ भारतीयक ताकत अछि जे एहि साल हमर देश कतेको विशेष उपलब्धि हासिल केलक अछि। आइ भारतक प्रत्येक कोना आत्मविश्वाससँ भरल अछि। ई विकसित भारतक भावना, आत्मनिर्भरताक भावनासँ भरल अछि। 2024 मे हमरा सभकेँ वैह भावना आ गति बनाकय रखबाक अछि।
वर्ष २०२३ मे भारत द्वारा प्राप्त उपलब्धिक उल्लेख करैत प्रधानमंत्री आगू कहलनि जे भारतक इनोवेशन हब बनब एहि बातक प्रतीक अछि जे ‘हम रुकयवाला नहिं छी।’ २०१५ मे ग्लोबल इनोवेशन इंडेक्समे हमसभ ८१म स्थान पर छलहुँ। आइ हमर रैंक 40 अछि। एहि साल भारतमे दाखिल पेटेंट सभक संख्या बेसी रहल अछि, जाहिमे लगभग ६० प्रतिशत घरेलू निधिसँ अछि। भारतक प्रयाससँ २०२३केँ अंतर्राष्ट्रीय मिलेट्स वर्षक रूपमे मनाओल गेल। एहिसँ एहि क्षेत्रमे काज करैवला स्टार्टअपकेँ बहुत अवसर भेटल अछि।
प्रधानमंत्री देशवासी सभकेँ स्वास्थ्यक विषयमे सेहो सलाह देलनि आ कहलनि जे जाहि तरहें शारीरिक स्वास्थ्यमे रुचि बढ़ि रहल अछि, एहि क्षेत्रसँ जुड़ल कोच आ प्रशिक्षकक माँग सेहो बढ़ि रहल अछि। ओ शारीरिक स्वास्थ्यक सङ्ग-सङ्ग मानसिक स्वास्थ्यपर जोर देबाक सलाह देलनि।
आर्टिफिशियल इंटेलिजेन्सक उपयोगिता आ उचित उपयोग पर जोर दैत प्रधानमंत्री कहलनि, “हालहिमे तमिलनाडुसँ हजारो लोक काशी-तमिल संगममे भाग लेबाक लेल काशी आयल छलाह। ओतय ओ ओहि लोकसभसँ संवाद करबाक लेल पहिल बेर सार्वजनिक रूपसँ कृत्रिम बुद्धिमत्ता उपकरणक उपयोग कयलनि। ओ कहलनि जे ओ मंचसँ हिन्दीमे सम्बोधित कऽ रहल छलथि मुदा एआई अनुवाद उपकरणक कारण, ओतय उपस्थित तमिलनाडुक लोककें हुनक वैऽह संबोधन ओही समय तमिल भाषामे सुनाई दऽ रहल छल।
