संबलपुरमे आईआईएमक स्थायी परिसरक कयलनि उद्घाटन
*
संबलपुर
*
प्रधानमंत्री नरेन्द्र मोदी शनिदिन ओडिशाक सम्बलपुरमे भारतीय प्रबंधन संस्थान (आईआईएम)क स्थायी परिसरक उद्घाटन कयलनि। एकर निर्माण ४०० करोड़ टाकाक लागतसँ भेल अछि। प्रधानमंत्री सम्बलपुरमे ६८,००० करोड़ टाकाक १८ परियोजनाक लोकार्पण आ शिलान्यास सेहो कयलनि। एहि अवसर पर मुख्यमंत्री नवीन पटनायक, राज्यपाल रघुबर दास आ केन्द्रीय शिक्षा मंत्री धर्मेन्द्र प्रधान सेहो उपस्थित छलाह।
प्रधानमंत्री मोदी कहलनि “हम ओडिशाकेँ शिक्षा आ कौशल विकासक केन्द्र बनयबाक लेल निरन्तर प्रयासरत छी। पछिला दस बरखमे राज्यकेँ समर्पित शैक्षणिक संस्थान ओडिशाक युवासभक जीवनमे परिवर्तन आनि रहल अछि। चाहे ओ आईआईएसईआर बेरहामपुर हो वा रासायनिक प्रौद्योगिकी संस्थान, ओडिशाक युवाक उज्जवल भविष्य सुनिश्चित करबाक लेल कतेको उच्च श्रेणीक संस्थान प्रदान कयल गेल अछि। ओ कहलनि “पछिला दस बरखमे केंद्र सरकार द्वारा बनाओल गेल नीतिसँ ओडिशाकेँ बहुत लाभ भेल अछि। खनन क्षेत्रमे हम जे नव सुधार अनने छी ओकर प्रमुख लाभार्थी ओडिशा अछि। खनन नीतिमे बदलावक बाद ओडिशाक आमदनी दस गुना बढ़ि गेल अछि। आगू प्रधानमंत्री कहलनि “आइ देश अपन एकटा महान सपूत पूर्व उप प्रधानमंत्री लालकृष्ण आडवाणीकेँ भारत रत्नसँ सम्मानित करबाक निर्णय लेलक अछि। भारतक उप प्रधानमंत्री, गृह मंत्री आ सूचना प्रसारण मंत्रीक रूपमे आ दशक धरि एकटा ईमानदार, जागरूक सांसदक रूपमे लालकृष्ण आडवाणी देशक लेल जे सेवा देलनि अछि ओ अद्वितीय अछि। आडवाणीक ई सम्मान एहि बातक प्रतीक अछि जे राष्ट्र ओहि लोककेँ कहियो नहिं बिसरैत अछि जे राष्ट्रक सेवामे अपन जीवन खपा देलक। हम सौभाग्यशाली छी जे लालकृष्ण आडवाणी जीक स्नेह आ मार्गदर्शन लगातार भेटल। हम लालकृष्ण आडवाणीक दीर्घायुक लेल प्रार्थना करैत छी।”
प्रधानमंत्री बिजली, सड़क आ रेलवे सँ जुड़ल कतेको बुनियादी ढाँचा परियोजनाक आधारशिला सेहो रखलनि।
आईआईएम परिसरक आधारशिला २०२१ मे पीएम मोदी द्वारा राखल गेल छल। प्रधानमंत्री मोदी पुरी-सोनपुर-पुरी साप्ताहिक एक्सप्रेस ट्रेनकेँ सेहो झंडी देखा कऽ रवाना कयलनि। एहिसँ एहि क्षेत्रमे सम्पर्कमे सुधार होयत। ओ झारसुगुडा प्रधान डाकघरक हेरिटेज बिल्डिंग सेहो राष्ट्रकेँ समर्पित कयलनि। ओ जगदीशपुर-हल्दिया आ बोकारो-धामरा पाइपलाइन परियोजना (जेएचबीडीपीएल)क अन्तर्गत ४१२ किलोमीटर नमगर धामरा अंगुल पाइपलाइन खण्डक उद्घाटन सेहो कयलनि। ई परियोजना ओडिशाकेँ राष्ट्रीय गैस ग्रिडसँ जोड़त। एकर निर्माण ‘प्रधानमंत्री ऊर्जा गंगा’क अन्तर्गत लगभग २,४५० करोड़ टाकाक लागतसँ कयल जायत।
