उत्पाद विभाग आ सिमरी पुलिस बहुत बेसी मात्रामे अंग्रेजी शराब बरामद कयलक

बेनीपुर समदिया

*

हरपुर पंचायतक सबौल चौरसँ पटना उत्पाद विभाग आ सिमरी पुलिस देर राति बहुत बेसी मात्रामे अंग्रेजी शराब बरामद कयलक अछि। ओतयसँ मिनी ट्रक, हेलिकॉप्टर नुमा कार आ तीनगो फटफटिया जब्त कयल गेल। अधिक मात्रामे शराब हेबाक कारणे गिनती पूरा नहिं भऽ सकल छल । ट्रकक बाॅडीक नीचावला भागमे बनल नमहर तहखानासँ लगभग पचास कार्टून ब्रांडेड शराब लदल हेबाक गुप्त सूचना पर ई कारवाई कयल गेल। हेलीकॉप्टर नुमा कारक अंदर बनल तहखानामे सेहो विदेशी शराब नुकाकय राखल छल । मौका ए बारदात परसँ पुलिस शराब कारोबारीक तीनटा फटफटिया केर सेहो जप्त कयलक। पुलिस प्रशासनकेँ आबैत देखि रातुक अनहारक लाभ उठाकय सभ धंधेबाज भागि गेलाह । तकरा बाद पुलिस मोबाइल टावर लोकेशनक आधार पर मुजफ्फरपुर बांद्रा प्रखंडक पियर थाना क्षेत्र कल्याण नगर निवासी लालू रायक बेटा अमरेश कुमारकेँ गिरफ्तार कय ओकरासँ पूछताछ कयल जा रहल अछि । गिरफ्तार युवकसँ उत्पाद विभागक डीएसपी सेहो थाना पहुंचिकय पूछताछ कऽ रहल छलाह । एहि संबंधमे सिमरी थानाध्यक्ष पूजा कुमारी बतेलनि जे शराबक मात्रा बेसी हेबाक कारणे गिनती पूरा नहि भऽ सकल अछि। गिरफ्तार युवकक निशानदेही पर जगह-जगह छापामारी कयल जा रहल अछि । बरामद तीनू फटफटिया , एगो ट्रक आ एगो कारक मालिकक सत्यापन लेल डीटीओकेँ प्रतिवेदन भेजबाक तैयारी कयल जा रहल अछि ।