की सभटा बिहार पुलिस बल अहाँकेँ दऽ दी? लालू परिवारक सभ सदस्यकेँ बंगला चाही : सीएम सम्राट चौधरी
पटना। समदिया
सीएम सम्राट चौधरी कहलनि जे, लालू परिवारक प्रत्येक सदस्य लेल अलग बंगला चाही। ओ कहलनि जे लालू यादव आ हुनकर परिवारक सुरक्षा लेल 150 पुलिसकर्मी तैनात अछि, तइयो एखनो हुनक दावा अछि जे सभटा सुरक्षा वापस ल लेल गेल अछि। बिहारक मुख्यमंत्री सम्राट चौधरी राजद सुप्रीमो लालू प्रसाद यादव आ हुनकर परिवार पर कड़ा हमला केलथि अछि। पटना मे ‘अत्यंत पिछड़ा वर्ग (ईबीसी) सम्मेलन’ केँ संबोधित करैत चौधरी बंगला आ सुरक्षाक संबंधमे विवाद पर लालू परिवारकेँ निशाना बनेलथि आ कहलनि जे एखन पूरा बिहार लालू यादवसँ डरैत अछि।
सीएम सम्राट चौधरी कहलनि जे, “लालू परिवारक प्रत्येक सदस्य लेल बंगला चाही। बेटा केर चाही, माता जी केँ एकटा चाही। लालू यादव आ हुनकर परिवारक सुरक्षा लेल 150 पुलिसकर्मी तैनात अछि, तइयो एखनो दावा करैत छथि जे सभ सुरक्षा वापस ल लेल गेल अछि। की हम सभ बिहारक पूरा पुलिस बल अहाँकेँ सौंप देब? तखन अति पिछड़ा वर्गकेँ सुरक्षा के देत? जतेक जरूरत अछि ओतेक सुरक्षा देल गेल अछि।”
ओ कहलनि जे, आइ पूरा बिहार लालू यादवसँ डरैत अछि, एहि डरसँ जे कहीं ओ बाहर निकलि कए किछु परेशानी नहि पैदा कय देथि। ओ आगू कहलनि जे, सबसँ पैघ खलनायक डरा गेल अछि एकर स्पष्ट तात्पर्य अछि जे बिहारमे सुशासन स्थापित भ गेल अछि।
