योजना सभक लोकार्पणकेँ चुनावी चश्मासँ नहिं देखी, ई विकसित भारतक अछि संकल्प : पीएम मोदी

आजमगढ़
*

प्रधानमंत्री नरेन्द्र मोदी आइ आजमगढ़सँ उत्तर प्रदेश सहित देशक सात राज्यमे ३४,७०० करोड़ टाकाक ७८२ विकास परियोजनाक उद्घाटन कयलनि।
एहि अवसर पर प्रधानमंत्री कहलनि जे चुनावक मौसममे पूर्ववर्ती सरकारमे बैसल लोक जनताक आँखिमे धूरा झोंकय लेल योजना सभक घोषणा करैत छलाह। २०१९ मे हम जे शिलान्यास कयलौंह ओ चुनावक लेल नहिं छल। आइ २०२४ मे कृपया एकरा चुनावक दृष्टिकोणसँ नहि देखू।

एहि दौरान प्रधानमंत्री कहलनि जे आइ आजमगढ़क सितारा चमकि रहल अछि। एकटा समय छल जखन दिल्लीमे कार्यक्रम होइत छल, देशक आन राज्यसँ लोक ताहिमे शामिल होइत छल, आ आइ आजमगढ़मे कार्यक्रमक आयोजन कयल जा रहल अछि आ देशक अन्य भागसँ हजारो लोक एहि सभामे शामिल भेल छथि।
आइ एतयसँ नहिं मात्र आजमगढ़ बल्कि पूरा देशक विकास लेल कतेको परियोजनाक उद्घाटन कयल जा रहल अछि। आजमगढ़क गिनती देशक पिछड़ल क्षेत्रमे कयल जाइत अछि। आइ ओ विकासक एकटा नव अध्याय लिखि रहल अछि। आइ आजमगढ़सँ ३४ हजार करोड़ टाकाक परियोजनाक आधारशिला राखल जा रहल अछि आ एकर उद्घाटन कयल जा रहल अछि।

प्रधानमंत्री नरेन्द्र मोदी कहलनि जे हमर सरकार पूर्वी उत्तर प्रदेश सहित पूरा देशक परिवारक जीवनकेँ आसान बनेबाक लेल दिन-राति काज कऽ रहल अछि।
आगा मोदी कहलनि जे भारतक प्रगतिसँ नाखुश किछु लोकक कहब छनि जे चुनावसँ पहिने एतेक परियोजनाक उद्घाटन एकटा राजनीतिक चारा अछि। हम हुनका सभकेँ मोन पाड़य चाहैत छी जे पहिने नेता लोकनि चुनावसँ पहिने योजनाक घोषणा करैत छलाह, मुदा पूरा नहिं करैत छलाह। आइ देश देखि रहल अछि जे जाहि परियोजनाक लेल हम आधारशिला रखलहुँ ओकर उद्घाटन सेहो हमही कयलौंह अछि।