पटनामे विकसित भारतक संकल्पक संग ‘सेवा ज्योति यात्रा’ शुरू

पटना । समदिया

पटनाक मिलर हाई स्कूल मैदानमे ‘विकसित भारत संकल्प सभा’ एवं ‘सेवा ज्योति यात्रा’क शुभारंभ भेल। मुख्यमंत्री सम्राट चौधरी कहलनि जे 2047 धरि भारतकेँ विकसित राष्ट्र बनेबाक लेल बिहारक समृद्ध आ सशक्त होएब जरूरी अछि।

सभाकेँ संबोधित करैत मुख्यमंत्री कहलनि जे प्रधानमंत्री नरेंद्र मोदीक नेतृत्वमे देश विकास आ जनकल्याणक क्षेत्रमे महत्वपूर्ण प्रगति कए रहल अछि। गरीब, महिला, युवा आ किसानक लेल विभिन्न योजना संचालित अछि। बिहारक करीब 89 लाख किसान प्रधानमंत्री किसान सम्मान निधिक लाभ उठा रहल छथि।

मुख्यमंत्री कहलनि जे जीविका दीदीसभक माध्यमे महिला सशक्तीकरणकेँ बढ़ावा भेटि रहल अछि। प्रधानमंत्री आवास योजना, आयुष्मान भारत, हर घर नल-जल, पीएम सूर्य घर योजना सहित विभिन्न योजनासँ आम लोकक जीवनमे सकारात्मक परिवर्तन आएल अछि।

ओ कहलनि जे विकसित भारतक लक्ष्य पूरा करबाक लेल बिहारक विकासमे सभक सक्रिय भागीदारी जरूरी अछि। कार्यक्रममे प्रधानमंत्री नरेंद्र मोदी आ भाजपा राष्ट्रीय अध्यक्ष नितिन नवीन वर्चुअल माध्यमसँ संबोधित कएलनि। भाजपा प्रदेश अध्यक्ष संजय सरावगी उपस्थित लोककेँ 2047 धरि विकसित भारत निर्माणक संकल्प दियौलनि।

एहि अवसर पर मुख्यमंत्री भाजपा प्रदेश कार्यालयमे प्रधानमंत्री नरेंद्र मोदीक 25 वर्षक सेवाकाल पर आधारित ‘मोदी @ 25’ प्रदर्शनीक उद्घाटन सेहो कएलनि।