प्रधानमंत्री नरेन्द्र मोदी, केन्द्रीय गृह मंत्री अमित शाह आ भाजपा अध्यक्ष जेपी नड्डा सोमदिन पूर्व प्रधानमंत्री आ दिग्गज भाजपा नेता अटल बिहारी वाजपेयीकेँ हुनक जयन्ती पर श्रद्धांजलि अर्पित कयलनि।
एक्स पर एकटा पोस्टमे प्रधानमंत्री कहलनि, “देशक जनताक तरफसँ पूर्व प्रधानमंत्री अटल बिहारी वाजपेयीकेँ हुनक जयन्ती पर श्रद्धांजलि। ओ जीवन भरि राष्ट्र निर्माणकेँ गति देबामे लागल रहलाह। भारतक प्रति हुनक समर्पण आ सेवा अमर युगमे सेहो प्रेरणाक स्रोत बनल रहत।”
अमित शाह एक्स पर कहलनि “हम पूर्व प्रधानमंत्री अटल बिहारी वाजपेयी जीकेँ जयंती पर याद करैत छी आ श्रद्धांजलि अर्पित करैत छी। अटल जी निस्वार्थ भावसँ देश आ समाजक सेवा केलनि आ भाजपाक स्थापनाक माध्यमसँ देशमे राष्ट्रवादी राजनीति केर एकटा नव दिशा देलनि।”
शाह आगू एक्स पर लिखलनि “जतय एक दिस ओ परमाणु परीक्षण आ कारगिल युद्धक माध्यमसँ दुनियाकेँ उभरैत भारतक शक्तिक अहसास करओलनि, दोसर दिस ओ देशमे सुशासनक दृष्टिकोणकेँ लागू कयलनि। देश हुनकर अतुलनीय योगदान केर सदैव याद रखत।”
नड्डा एक्स पर लिखलनि “हम भारतीय राजनीतिक शिखर पुरुष, अपन अग्रणी, पूर्व प्रधानमंत्री, भारत रत्न अटल बिहारी वाजपेयी जीकेँ हुनक जयन्ती पर हार्दिक श्रद्धांजलि अर्पित करैत छी। “
आगू नड्डा कहलखिन, “राष्ट्रीय उत्थान आ जनसेवा लेल समर्पित हुनक पूरा जीवन हमरा सभक लेल सदैव प्रेरणास्रोत बनल रहत।”
भारतीय जनता पार्टी (भाजपा) सोमदिन वाजपेयीक ९९म जयंती भव्य ढंगसँ मनेलक।
एहि अवसर पर भाजपा देशभरमे कतेको कार्यक्रम आयोजित कयलक अछि । वाजपेयीक जन्म २५ दिसंबर, १९२४केँ मध्य प्रदेशक ग्वालियरमे भेल छल आ तीन बेर भारतक प्रधानमन्त्रीक रूपमे चुनल गेल छलाह।
