तेसर पारीमे भारत विश्वक टाॅप-३ इकोनॉमीमे निश्चित – प्रधानमंत्री मोदी
सूरत
*
सूरतमे एयरपोर्ट टर्मिनल बिल्डिंग एंड डायमंड सेंटरक उद्घाटन केलाक बाद एकटा जनसभाकेँ सम्बोधित करैत मोदी कहलनि जे पछिला १० सालमे भारत १० आर्थिक शक्तिसँ पाँचम स्थान पर पहुँचि गेल अछि। आब मोदी देशकेँ गारंटी दैत अछि जे अपन तेसर पारीमे भारत निश्चित रूपसँ दुनियाक शीर्ष-३ अर्थव्यवस्थामे शामिल होयत। मोदी कहलनि “सूरतकेँ कहियो सूर्यक शहर कहल जाइत छल मुदा एहिठामक लोकक मेहनतसँ ई हीराक शहर आ रेशमक शहर बनि गेल अछि। आइ सूरत लाखो युवाक लेल सपनाक शहर अछि आ आब सूरत सेहो आईटीक क्षेत्रमे प्रगति कऽ रहल अछि। आइ-काल्हि अहां सभ ‘मोदीक गारंटी’ के बारे मे बहुत गप्प सुनि रहल होयब। हालक चुनाव परिणामक बाद ई चर्चा बढ़ल अछि, मुदा सूरतक लोक तऽ ‘मोदीख गारंटी’ केँ बहुत पहिनेसँ जानैत छथि। एहिठामक मेहनती लोक ‘मोदीक गारंटी’केँ वास्तविकतामे बदलैत देखलनि अछि आ एहि गारंटीक एकटा उदाहरण ई ‘सूरत डायमंड बूर्स’ सेहो अछि। सूरत डायमंड बूर्स भारतीय डिजाइनर, भारतीय सामग्री आ भारतीय अवधारणाक क्षमताकेँ प्रदर्शित करैत अछि। ई भवन नव भारतक शक्तिक एकटा उदाहरण अछि। आइ अंतर्राष्ट्रीय माहौल भारतक पक्ष मे अछि। आइ पूरा दुनियामे भारतक विश्वसनीयता बेसी अछि। भारतक चर्चा पूरा दुनिया मे भऽ रहल अछि। आब ई एकटा मजबूत ब्रांड बनि गेल अछि। तेँ हम अहां सभसँ कहब… एकटा संकल्प लिअ आओर एकरा साबित करू।”
प्रधानमंत्री मोदी आइ सूरतक दौरा पर छथि, जतय ओ शहरकेँ दोहरा उपहार देलनि। प्रधानमंत्री मोदी रविदिन सूरत हवाई अड्डा पर नव टर्मिनल भवनक उद्घाटन कयलनि। एकर बाद पीएम मोदी सूरतक डायमंड सेंटर पहुँचलाह आ एकर उद्घाटन कयलनि। एहि दौरान राज्यक मुख्यमंत्री भूपेन्द्र पटेल सेहो उपस्थित छलाह। सूरतक डायमंड बूर्स दुनियाक सबसँ पैघ आ आधुनिक अंतर्राष्ट्रीय हीरा आ आभूषण व्यवसाय केन्द्र अछि। ई कच्चा आ पॉलिश कयल गेल हीरा व्यापारक वैश्विक केन्द्र होयत। एहि केन्द्रमे आयात आ निर्यातक लेल एकटा कस्टम क्लीयरेंस हाउस बनाओल गेल अछि। संगहि संग एहिमे खुदरा आभूषणक लेल मॉल आ अंतर्राष्ट्रीय बैंकिंग केन्द्र सन सुविधा सेहो होयत।
शुक्रदिन प्रधानमंत्री मोदीक अध्यक्षता मे भेल केन्द्रीय मंत्रिमंडलक बैसारमे सूरत हवाई अड्डाकेँ अन्तर्राष्ट्रीय हवाई अड्डा बनयबाक प्रस्तावकेँ सेहो मंजूरी देल गेल। जकर बाद सूरत हवाई अड्डाकेँ अन्तर्राष्ट्रीय हवाई अड्डाक दर्जा भेटल। एयर इंडिया एक्सप्रेस रविदिन सूरत हवाई अड्डासँ दुबई लेल उड़ान भरत। नव टर्मिनल भवनक उद्घाटनक बाद एहि हवाई अड्डामे १८०० यात्रीकेँ सम्हारबाक क्षमता होयत। नव टर्मिनलक भीतर गुजरात आ सूरत शहरक संस्कृतिसँ जुड़ल चित्र प्रदर्शित कयल गेल अछि। एहि परियोजनाक कुल लागत ३५३.२५ करोड़ रुपैया अछि। हवाई अड्डा पर एकटा नव पार्किंग सेहो बनाओल गेल अछि।
ओतहि सूरतक डायमंड सेंटर दुनियाक सबसँ पैघ कार्यालय भवन अछि। जाहि कारण सूरत डायमंड बूर्सक नाम गिनीज बुक ऑफ वर्ल्ड रिकॉर्डमे पहिनेसँ दर्ज भऽ चुकल अछि। ई भवन 67 लाख वर्ग फीटमे बनल अछि आ एकरा बनेबा लेल लगभग 3500 करोड़ रुपयाक खर्च भेल अछि। एहि भवनमे एक सङ्ग ४५०० हीरा व्यापारिक कार्यालय समायोजित भऽ सकैत अछि। पूरा भवनमे १५-१५ मंजिलक नौ टा टावर अछि, जकर कार्यालयक स्थान ३०० वर्ग फीटसँ एक लाख वर्ग फीट धरि अछि। डायमंड बूर्सकेँ इंडियन ग्रीन बिल्डिंग काउंसिलसँ प्लैटिनम रेटिंग सेहो भेटल अछि।
