मिथिला क्षेत्रीय बिहारक दरभंगाक डीएमसीएच हास्पिटलमे डाक्टरक ‘शराब पार्टी’
दरभंगा
*
मिथिला क्षेत्रीय बिहारक सबसँ पैघ अस्पताल दरभंगाक डीएमसीएचसँ एकटा कानूनक उल्लंघनक दृश्य सामने आयल अछि, जाहिमे कॉलेज परिसरमे डॉक्टरसभ द्वारा शराब पार्टी करबाक एकटा वीडियो सामने आयल अछि। जहिना वीडियो सामने आयल, डॉक्टरसभमे हड़कंप मचि गेल। जाप प्रमुख पप्पू यादव वीडियो ट्वीट करैत लिखलनि जे बिहारमे शराबबंदी मात्र गरीबक लेल आ डीएमसीएचक डॉक्टरक लेल अलग कानून अछि। ओना डीएमसीएचक प्राचार्य डॉ. के. एन. मिश्र एहि तरहक शराब पार्टी होयबाक बातसँ इनकार कयलनि अछि, मुदा वीडियोमे स्पष्ट अछि जे डॉक्टरसभ अपन मुँह नुकाबैत कोठरीसँ बाहर निकलैत देखल जा रहल अछि।
जखन हुनका पूछल जाइत अछि तखन डॉक्टर जवाब देबासँ परहेज करैत देखल जाइत छथि। दरभंगाक एसएसपी ए. कुमार कहलनि, “हम वीडियो देखलहुं, संबंधित पुलिस थानाकेँ एफआईआर दर्ज करबाक आ कार्रवाई करबाक निर्देश देल गेल अछि।” दरभंगाक डीएमसीएचमे आयोजित बाल रोग विशेषज्ञ सभक लेल एकटा सम्मेलनक दौरान शराब पार्टीक वीडियो वायरल भेलाक बाद दरभंगा पुलिस हरकतमे आबि गेल आ एसएसपी ए. कुमारक निर्देश पर सदर डीएसपी अमित कुमार द्वारा गठित एकटा टीम डीएमसीएच पर छापा मारलक।
एहि दौरान पुलिस गेस्ट हाउससँ तीन बोतल दारू सेहो बरामद केलक अछि। वीडियोमे देखल गेल डॉक्टरक सेहो पहिचान कऽ तलाशी लेल जा रहल अछि। दरभंगा पुलिस डीएमसीएचक आन स्थानक खोजमे सेहो लागल अछि। वर्तमानमे पूरा डीएमसीएच परिसरमे पैघ संख्यामे पुलिस बल तैनात कयल गेल अछि। डीएमसीएच पर छापा मारय लेल आयल सदर डीएसपी अमित कुमार कहलनि जे गेस्ट हाउसमे कुल पाँच टा कमरा अछि, जाहिमे निचला मंजिल पर एकटा कमराक तलाशीक दौरान तीन बोतल शराब बरामद कयल गेल अछि।
गेस्ट हाउसक देखभालकर्तासँ पूछताछ कयल जा रहल अछि। ओ कहलनि जे ऊपरी कोठरीमे एकटा वरिष्ठ चिकित्सक उपस्थित छलाह जे आइ साँझ आयल छलाह। ओ पीएमसीएचमे तैनात छथि। हुनकर कोठरीसँ कोनो आपत्तिजनक सामग्री बरामद नहिं भेल अछि। ओ आगू कहलनि जे शनिदिन डीएमसीएचमे आयोजित एकटा पार्टीक वीडियो वायरल भेल, जाहिमे शराबक सेवन देखल गेल। ई सत्यापनक लेल पुलिस आएल छल। वीडियोक पहचान चेहरासँ कएल जा रहल अछि। उचित पहचानक बाद, निश्चित रूपसँ कारवाई कयल जायत।
