वाइब्रेंट गुजरात शिखर सम्मेलनकेँ सम्बोधित करैत पीएम मोदी कहलनि जे भारतक स्वतंत्रताक ७५ वर्ष पूरा भऽ चुकल अछि आ आब भारत अगिला २५ साल धरि लक्ष्यपर काज कऽ रहल अछि। आब जखनि भारत अपन स्वतंत्रताक १०० वर्ष मनाओत, ताबत धरि हम भारतकेँ विकसित करबाक लक्ष्य निर्धारित कऽ चुकल छी। ई २५ सालक कार्यकाल भारतक ‘अमृतकाल’ अछि। एहि अमृतकालमे आयोजित कयल जा रहल ई पहिल वाइब्रेंट गुजरात शिखर सम्मेलन अछि, तेँ एकर महत्व आओर बढ़ि गेल अछि।
प्रधानमंत्री मोदी आगू कहलनि “आइ भारत दुनियाक पाँचम सबसँ पैघ अर्थव्यवस्था अछि। दस साल पहिने भारत ११म स्थान पर छल। आइ सभ प्रमुख एजेंसी भविष्यवाणी करैत अछि जे आबयवला वर्षमे भारत दुनियाक शीर्ष तीन अर्थव्यवस्थामे शामिल होयत। दुनिया भरिक लोककेँ अपन विश्लेषण करय दियौक, मुदा ई हमर गारंटी अछि जे ई होयत।”
एहि अवसर पर पीएम मोदी कहलनि, एहि आयोजनमे यूएई केर राष्ट्रपतिक संग शामिल होयब हमरा सबहक लेल बहुत खुशीक बात अछि। वाइब्रेंट गुजरात शिखर सम्मेलनमे मुख्य अतिथिक रूपमे एतय हुनक उपस्थिति भारत आ संयुक्त अरब अमीरातक बीच दिन-प्रतिदिन बढ़ैत आत्मीय सम्बन्धक प्रतीक अछि।
