लोकसभा चुनावकेँ लऽ कऽ राजनीतिक गर्मी बढ़ैत देखाइत दय रहलअछि। चुनावक तारीखक घोषणा एखन धरि नहिं कयल गेल अछि, मुदा सभ राजनीतिक दल जोर देब शुरू कऽ देलक अछि।
एक दिस जतय भाजपा हैट्रिक बनेबाक लेल जुटल अछि, दोसर दिस सीटक बंटवाराकेँ लऽ कऽ इंडिया गठबंधनमे एखन धरि मतभेद देखल जा रहल अछि। भाजपा नेता इहो दावा कयलनि जे गठबंधन सरकारमे सब किछु ठीक नहिं चलि रहल छल। एहि बीच राजगमे शामिल दलक नेता सेहो बैसारमे लागल छथि। बुधदिन लोजपा (राम विलास) प्रमुख चिराग पासवानक घर पर दही-चूड़ाक आयोजन कयल गेल, जाहिमे राजगक नेता लोकनि भाग लेलनि।
बुध कऽ दिनमे दही-चूड़ाक आयोजन कऽ ‘हम’ पार्टीक प्रमुख जीतन राम मांझी, राष्ट्रीय लोक जनता दलक प्रमुख उपेन्द्र कुशवाहा आ चिराग दिल्ली पहुँचलाह।
चिरागक दिल्ली निवास पर राजगक नेता हुनकासँ भेंट करबाक लेल पहुँचलाह। ज्ञात अछि जे २२ जनवरीकेँ अयोध्या राम मंदिरमे प्राण प्रतिष्ठाक पूजा केर लऽ कऽ भाजपामे खूब उत्साह अछि। संगहि जाहि तरहें विपक्षी दल प्राण प्रतिष्ठामे जायसँ मना कऽ रहल अछि, एहिसँ पता चलैत अछि जे ई कार्यक्रम पूर्ण रूपसँ भाजपाक समर्थनमे अछि आ आगामी लोकसभा चुनावमे राम मन्दिर सबसँ पैघ मुद्दा भऽ सकैत अछि।
राजनीतिक जानकारक अनुसार आगामी चुनावमे सत्ता प्राप्त करबामे राम मन्दिरक महत्वपूर्ण भूमिका रहत। संगहि ई कतेको दलक राजनीतिक खेल सेहो बिगाड़ि सकैत अछि। दोसर दिस भाजपा एक बेर फेर हिन्दुत्वक मुद्दा पर अपन नाव पार करबाक तैयारी कऽ रहल अछि। मनोज झा राष्ट्रपिता महात्मा गाँधीक उदाहरण दैत भाजपापर घोर निशाना साधलनि। ओ कहलनि जे हमर नजरिमे महात्मा गाँधीसँ पैघ कोनो हिन्दू नहिं अछि, जे गोली लगलाक बादो ‘हे राम’ कहि संसार छोड़ि गेलाह। भाजपा राम मंदिरक नाम पर राजनीति कए रहल अछि।
