हर्ष एवं सोल्लासपूर्वक आयोजित भेल दशम धीरज प्रतिभा सम्मान समारोह

एहि तरहक आयोजनमे भेल सीधा साक्षात्कार किशोर/युवाकेँ हृदय पर स्थाई छाप छोड़ैत अछि : अजय नाथ झा शास्त्री

मुंबई समदिया!! ‘कोनो भी सामाजिक संगठनक लेल गौरवक अवसर होइत अछि प्रेरणादायक कार्यक्रम। एहेन कार्यक्रम जे समाजक प्रति गौरवबोध करेबाक प्रति समर्पित हो संगहिँ समाज द्वारा संस्थाक मुक्तकंठ द्वारा प्रशंसा कयल जाय। एहने कार्यक्रम जे छात्र/छात्राक प्रति समर्पित, विगत 2017 ईस्वीसँ मैथिल समन्वय समिति द्वारा “धीरज प्रतिभा सम्मान” केर रूपमे आयोजित होइत आबि रहल अछि। कार्यक्रमक सफलताक पैघ प्रमाण इएह अछि जे आयोजनक प्रतीक्षा मुंबई प्रवासी मैथिल समाजकेँ रहैत छन्हि। फलत: 02 अगस्त, 2026 अर्थात् रविदिन दशम् धीरज प्रतिभा सम्मान समारोहक भव्य व विलक्षण प्रस्तुतिक साक्षी बनल राम गणेश गडकरी रंगायतनक प्रेक्षागृह’, ई उद्गार व्यक्त करैत मैथिल समन्वय समितिक अध्यक्ष राजकुमार झा मैपुप्र समदियाकेँ रवि, ०२ अगस्त २०२६ केर मुंबईमे भेल समारोहक प्रति जनतब देलनि।

ओ आगू कहलनि, ‘सभागार मिथिलामय बनल छल। मैथिल समन्वय समितिक पदाधिकारीगण पारम्परिक परिधान लालकुर्ता धोती/पायजामा परिधानमे सुसज्जित भऽ अतिथि-अभ्यागत समेत छात्र/छात्राकेँ स्वागत करबाक लेल समुत्सुक छलाह।’

‘समितिक पदाधिकारीगण द्वारा आयोजनक तैयारीक प्रति अहर्निश प्रयासक फलस्वरूप पुन: सफलताक कीर्तिमान स्थापित भेल। जाहि प्रकारेँ समितिक डाॅ. संदीप झाक मृदुल संरक्षकत्वमे, समितिक पदाधिकारीगण परिश्रमक पराकाष्ठा करैत छथि, हिनका लोकनिक समर्पित प्रतिबद्धताक प्रति आभार व्यक्त करैत आह्लादित छी। समितिक कार्यक्रममे पदाधिकारीगणक प्रत्यक्ष एवम् अप्रत्यक्ष सहयोग स्तुत्य अछि। विशेष कय समितिक ऊर्जावान पदाधिकारी राकेश कुमार झा एवम् प्रमोद झा जाहि प्रकारेँ कार्यक्रमक सफलताक लेल तन्मयतापूर्वक स्वयंकेँ समर्पित करैत छथि अद्वितीय अछि। प्रेक्षागृहमे जमल जनमानसक मध्य छात्र/छात्राक उत्साह अवर्णनीय छल। वरिष्ठ समाजसेवीक उपस्थिति, विभिन्न सामाजिक संगठनक सम्मानित पदाधिकारीगण, विपुल संख्यामे मातृशक्तिक संग भगिनीजनक उपस्थिति, आयोजनक सफलताक प्रमुख आधार बनल।

भगवती वंदनाक संग अपन सुमधुर स्वर द्वारा मिथिलाक सुप्रसिद्ध गायिका प्रिया मल्लिक द्वारा प्रस्तुति सभागारकेँ भक्तिमय बना देलक। समितिक संरक्षक डाॅ. संदीप झा द्वारा ओजपूर्ण एवम् प्रेरक वक्तव्य छात्र/छात्राक लेल नहि बल्कि आम जनमानसक जीवनमे सफलताक मूल आधार बनबाक प्रेरणा प्रदान कयलक। तहिना मुख्य अतिथि नित्यानंद झा द्वारा प्रस्तुत ज्ञानवर्द्धक मार्गनिर्देशन, युवावर्गक जीवनमे सफलतारूपी लक्ष्यसिद्धि लेल मार्ग प्रशस्त करबामे अत्यधिक उपयोगी बनत। विशिष्ठ अतिथि स्वामी अद्वैत चैतन्य प्रभु महाराज अपन वक्तव्यमे जीवनक सफलताक प्रस्तुतिक सूत्र प्रस्तुत कयलनि।

आयोजनक विलक्षण संचालन समितिक पंकज झा एवम् धनंजय झा कयलनि। छात्र/छात्राकेँ सम्मान-पत्र, मोमेंटोक संग सम्मानित कयल गेल। एहि अवसर पर समाजमे अपन योगदान देनिहार पाँच वरिष्ठ समाजसेवी, क्रमशः जयमाधव झा, चक्रधर झा, राजनारायण झा, कृष्ण कुमारझा ‘अन्वेषक’ एवम् विनोद कुमार झा ‘सरकार’केँ “प्रेरणा-सम्मान” सम्मानोपधि द्वारा सम्मानित कयल गेल। नगरसेविका मीनू धनंजय झाकेँ सम्मानित कयल गेलनि। आयोजनक प्रायोजककेँ प्रतीक चिन्ह प्रदान कय सम्मानित कयल गेलनि। नव पेट्रोन सदस्यकेँ संरक्षक महोदय द्वारा प्रतीक चिन्ह केर माध्यमेँ सम्मानित कयल गेल। प्रत्येक वर्षक भाँति पाँच छात्र/छात्राकेँ ₹11,000/- (ग्यारह हजार) दय सहायता प्रदान कयल गेल। भोरेसँ इन्द्रदेवक कृपा बरसि रहल छल। बरखा-बुन्नीक विकरालताक मध्य उत्साहित समितिक पदाधिकारीगणक उत्साह चरम पर छल। परम्परागत परिधान लाल कुर्ता, उज्जर धोती/पायजामामे आकर्षक बनि सहजहिँ सभक ध्यान अपना दिसि आकृष्ट कऽ रहल छल। एहि प्रकारेँ दशम् धीरज प्रतिभा सम्मान समारोहक विधिवत समापन राष्ट्रगानक पश्चात् भेल। पुन: समस्त प्रवासी मैथिल समाजक प्रति समिति धन्यवाद ज्ञापित करैत अछि।
⭐
एहि तरहक आयोजनमे भेल सीधा साक्षात्कार किशोर/युवाकेँ हृदय पर स्थाई छाप छोड़ैत अछि : अजय नाथ झा शास्त्री
*
दशम धीरज प्रतिभा सम्मानक अनुभवक संक्षिप्त उद्गार अजय नाथ झा शास्त्री एहि प्रकारसँ व्यक्त कयलनि अछि :-:

ओना ज्ञान आइ-काल्हि ढ़ाकीक ढ़ाकी फोकटेमे शोसल साइट्स सभ पर भेटैत रहैत छैक, मोटिवेशनल स्पीचक भरमार रहैत छैक, मुदा ओ ज्ञान सभ जहिना एक कान दऽ कऽ आओत तहिना दोसर कान दऽ कऽ निकलि जाओत, कारण जाधरि ओकरा मस्तिष्कमे स्थान देबै-देबै ताधरि अहाँ लग दोसर मोटिवेशनल स्पीच आ दृश्य आबि जाओत आ अहाँ तकरा देखय-सुनयमे लागि जाएब, आ ईएह सिलसिला चलैत रहैत छैक, परिणाम अहाँक समय ओहि मोटिवेशनल स्पीच आ दिव्य ज्ञान ओ दिव्य चित्रणकेँ देखय-सूनयमे चलि जाओत आ प्राप्ति शून्य, कारण मस्तिष्कमे टिकबे नहिं करत किछु, एही लेल अनुभवी जन सोशल मीडियासँ बँचय केर, स्वयं तकर नियंत्रणमे नहिं भऽ कऽ तकरा अपन नियंत्रणमे राखय केर आ जतबे एकटा छोट समय हम चाहब ततबे मात्र देब ई दृढ़ निश्चय आ संकल्प एवं से कऽ कऽ देखेनाई आदिक वास्तविक राह देखाबैत छथि, मुदा ई अहाँकेँ सोशल मीडियासँ नहिं बल्कि सीधा साक्षात्कारसँ प्राप्त होएत।

आ एही तरहक इवेंट ओ कार्यक्रमक आयोजन आइ दस बरखसँ प्रतिवर्ष करैत आबि रहल अछि ‘धीरज प्रतिभा सम्मान’क रुपमे “मैथिल समन्वय समिति।” जँ अहाँक बच्चा जीवनमे किछु करय चाहैत अछि वा अहाँ अपन बाल-बच्चाकेँ जीवनमे सफलताक ऊँचाई धरि लऽ जाय चाहैत छी, तऽ जँ अहाँक बच्चामे बात बुझय केर क्षमता आबि गेल छैक तऽ एहि तरहक आयोजन अर्थात एहि ‘धीरज प्रतिभा सम्मान समारोह’ एहेन आयोजनमे अवश्य लऽ कऽ आउ, कारण एहि ठाम सीधा साक्षात आमने-सामने जे सूनय आ देखय केर भेटत से जे मस्तिष्कमे घर करतै, से मिटतै नहिं आ जखनि बच्चाक मस्तिष्कमे कोनो बात शुरुआतमे घर कऽ जाइत छैक, तखनि तकरा ओ मोन पर लैत अवश्य तेहने बनय केर प्रयास करैत अछि आ तदनुसार तकर सतत क्रियाकलाप रहैत छैक। मस्तिष्कमे शुरुआतमे घर कयल बातक एहेन प्रभाव होइत छैक जे कोनो कारणवश परिस्थितिवश ओ शुरुआतक समय पूरा नहिंयो भऽ पाबैत छैक, तइयो तकरा ओ बिसरैत नहिं अछि आ समय भेटिते तकरा ओ प्रतिकूलो परिस्थितिमे पूरा करय केर जिद्दसँ सफल कऽ लैत अछि।

खास कऽ जाहि ‘धीरज प्रतिभा सम्मान’ एहेन समारोहक शीर्षस्थ कर्ता-धर्ता स्वयं प्रतिभाक भंडार आ अनुभव एहेन जे वास-प्रवासमे शिक्षाक क्रांति आनि देबयवाला महान शिक्षाविद संदीप फाउंडेशन/ संदीप युनिवर्सिटी सभकक चेयरमैन स्वयं संदीप झा उपस्थित होथि ताहि समारोहक प्रधानताक अनुमान वैऽह भाग्यशाली बच्चा एवं अभिवावकजन लगा पओताह जिनकर सौभाग्य आ कर्म ओहिमे सहभागिता धरि पहुँच बना पाओत।

रवि, ०२-०८-२०२६, केँ मुंबई केर थाने स्थिति ‘राम गणेश गडकरी रंगायतन’ हाॅलमे दसम धीरज प्रतिभा सम्मान समारोह छल, तकर थोड़बो अनुभव शब्दमे प्रेषित करब शीघ्र संभव नहिं, बस संक्षिप्तमे मूल भाव बताबय केर प्रयास कयलौंह अछि। मैपुप्र द्वारा कवरेज विडियोमे एकर प्रमाणिकता भेटत।

मुदा फेर वैऽह बात जे ईहो बात आ ऑडियो-वीडियो तऽ मिडिया वा सोशले मिडिया पर प्रस्तुत भेल रहत, तऽ से तहिना एक कानसँ सुनबै आ दोसर कानसँ निकलि जाओत, तऽ ताहि लेल वैऽह सलाह जे एहि ‘धीरज प्रतिभा सम्मान समारोह’ कार्यक्रम जे हर साल होइत छैक ताहिमे अपन बुझयवाला क्षमता प्राप्त बच्चाक संग अर्थात किशोर/युवाक संग अभिवावकजन उपस्थित होउ, पुनः अपने सभटा दिव्यज्ञान भऽ जाओत।

आ आखिरमे ‘मैथिल समन्वय समिति’क आयोजकगणसँ एकटा अनुरोध जे एहि तरहक प्रतिभा समारोह मुंबई केर संग-संग धरातल मिथिलोमे सालाना एक्कौह बेर करथि तऽ सोनमे सुंगध।