बांकीपुर उपचुनावक हारिक बीच पीएम मोदीसँ भेटलाह नीतीश कुमार
नई दिल्ली । समदिया
बांकीपुर विधानसभा उपचुनावमे एनडीएक हारिक बाद बिहारक पूर्व मुख्यमंत्री आ जदयूक राष्ट्रीय अध्यक्ष नीतीश कुमार मंगलकेँ नई दिल्लीमे प्रधानमंत्री नरेंद्र मोदीसँ संसद भवन स्थित हुनक कार्यालयमे भेंट कयलनि। राजनीतिक दृष्टिसँ एहि भेंटकेँ अत्यन्त महत्वपूर्ण मानल जा रहल अछि।
जदयूक राष्ट्रीय कार्यकारी अध्यक्ष संजय झा सोशल मीडियाक माध्यमसँ भेंटक तस्वीर साझा करैत जनौलनि जे प्रधानमंत्री आ नीतीश कुमारक बीच आत्मीय वातावरणमे बिहार तथा पूर्वोत्तर भारतक विकाससँ जुड़ल अनेक महत्वपूर्ण विषय पर सार्थक विचार-विमर्श भेल। एहि अवसर पर केन्द्रीय मंत्री आ जदयूक वरिष्ठ नेता राजीव रंजन सिंह ‘ललन सिंह’ सेहो उपस्थित छलाह।
राज्यसभाक सदस्य बनलाक बाद प्रधानमंत्रीसँ नीतीश कुमारक ई पहिल औपचारिक भेंट मानल जा रहल अछि। राज्यसभाक मानसून सत्रमे भाग लेबाक लेल दिल्ली पहुँचल नीतीश कुमारक एहि भेंटकेँ राजनीतिक हलकामे विशेष महत्व देल जा रहल अछि।
उल्लेखनीय अछि जे हालहि सम्पन्न बांकीपुर विधानसभा उपचुनावमे एनडीएकेँ अप्रत्याशित हारिक सामना करए पड़ल। जनसुराज पार्टीक सूत्रधार प्रशांत किशोर भाजपा प्रत्याशी नीरज सिन्हाकेँ 19 हजारसँ अधिक मतसँ पराजित कऽ पारम्परिक भाजपाक गढ़ मानल जाएबला बांकीपुर सीट पर विजय प्राप्त कयलनि। एहि परिणामक बाद एनडीए कार्यकर्तामे निराशाक वातावरण अछि, जाहि बीच प्रधानमंत्री आ नीतीश कुमारक भेंट राजनीतिक दृष्टिसँ अनेक संकेत दैत देखल जा रहल अछि।
