पाछू हटलौंह तँ नौकरी करय लायक नहि छोड़ब : एसपी
पटना। समदिया
पटनामे छात्रक हंगामाक बीच एसपी संकेत कुमारक वीडियो सामने आयल अछि, जाहिकेँ ल कय सवाल उठि रहल अछि।
दिल्लीमे छात्रक ‘संसद मार्च’ केर दौरान केंद्रीय शिक्षा मंत्री धर्मेन्द्र प्रधानक इस्तीफाक मांग आ लाठीचार्जक विरोधक संग पटनामे काल्हि भारी विरोध प्रदर्शन देखल गेल। एहि दौरान पुलिस बल प्रयोग कयल गेल। एम्हर पुलिस अधीक्षक संकेत कुमारक वीडियो सामने आयल अछि, जाहिमे ओ पुलिसकर्मीकेँ कठोर निर्देश जारी करैत सुनल जा रहल छथि।
पटना पश्चिमी एसपी संकेत कुमार लाठीचार्जसँ पहिने कड़ा लहजामे पुलिस जवानकेँ कहि रहल छथि, ‘पाछू हटब तँ नौकरी करय लायक नहि छोड़ब’। हुनक निर्देशक बाद पुलिस अधीक्षकक अगुवाईमे तमाम पुलिसकर्मी भीड़ दिस दौड़ल।
भारी संख्यामे छात्र राजभवन (लोकभवन) दिस मार्च केलक। मार्चक दौरान गांधी मैदान लग जेपी गोलम्बर पर पुलिस आ प्रदर्शनकारीक बीच झड़प भ गेल। जखन छात्र बैरिकेड तोड़बाक प्रयास कयलक तँ पुलिस रोकबाक प्रयास केलक।
मुदा आंसू गैसक गोला आ वाटर कैनन केर इस्तेमालक बावजूद छात्र नहि मानलक। झड़प केर दौरान गांधी मैदान थानाक थानेदारक माथ फाटि गेल। एकर बाद पुलिस कठोर रुख अपना लेलक आ लाठी-चार्जक सहारा लेलक।
एहि बीच विरोध करय वला छात्र मुख्यमंत्री आवास पर पहुंचल। ओतय हजारों छात्रक भीड़ जमा भ गेल। पुलिस वाटर कैननक प्रयोग कय छात्रकेँ तितर-बितर करय केर कोशिश कयलक। जखन विद्यार्थी सभ नहि हटल तँ पुलिस हल्का बल प्रयोग केलक आ भीड़केँ तितर-बितर करबाक प्रयास कयलक, आंसू गैस प्रयोग कयल गेल।
विरोध प्रदर्शनक दौरान भागलपुरसँ भाजपा विधायक रोहित पांडेयक काफिला पर हमला भेल, पाथर चलाबय केर कारण हुनका चोट लागल अछि। पटना आईजीक एस्कॉर्ट वाहन पर सेहो हमला भेल। जिला मजिस्ट्रेट (डीएम) आ एसपीक सामने ताली बजा कय प्रदर्शनकारी अपन विरोध दर्ज करौलक।
