भरत तिवारी मुठभेड़ प्रकरणमे पैघ कार्रवाई
भरत तिवारी पर गोली चलौनिहार STF जवान गिरफ्तार, जांचमे आब तेजीक उम्मीद
पटना । समदिया
भोजपुर जिलाक चर्चित भरत तिवारी मुठभेड़ प्रकरणमे पैघ कार्रवाई करैत पुलिस भरत तिवारी पर गोली चलौनिहार बिहार स्पेशल टास्क फोर्स (STF) केर जवान अक्षयकेँ गिरफ्तार कएने अछि। ओ ओहि टीमक सदस्य छल, जे कथित मुठभेड़क समय घटनास्थल पर उपस्थित छल। भरत तिवारीक माय पहिनेसँ एहि जवान पर अपन पुत्रक हत्या करबाक आरोप लगबैत निष्पक्ष जांचक मांग करैत आबि रहल छथि।
भरत तिवारीक मृत्युक बाद परिजन पुलिस कार्रवाई पर गंभीर प्रश्न उठबैत एहि घटनाकेँ फर्जी मुठभेड़ बतौने छलाह। गिरफ्तारीक बाद आब परिजनकें जांचसँ न्याय भेटबाक आशा बढ़ल अछि।
हालहिमे मुख्यमंत्री सम्राट चौधरी भरत तिवारीक परिजनसँ पटना मे भेंट कएने छलाह। परिजन अपन पक्ष आ मांग मुख्यमंत्रीक समक्ष रखने छलाह, जकर उपरान्त सरकार एहि प्रकरणमे प्रशासनिक कार्रवाई आरम्भ कएलक।
एहि क्रममे तत्कालीन जगदीशपुर एसडीपीओ राजेश कुमार शर्मा केँ पदसँ हटाकऽ पुलिस मुख्यालय पठा देल गेल। बादमे हुनका मद्य निषेध विभागमे डीएसपीक जिम्मेदारी देल गेल छल, मुदा विवाद बढ़लाक बाद फेर पुलिस मुख्यालय वापस बजा लेल गेलनि। एकर अतिरिक्त जगदीशपुरक एसडीओ संजीत कुमारकेँ सेहो पदसँ हटाकऽ सामान्य प्रशासन विभागमे योगदान देबाक निर्देश देल गेल अछि।
भरत तिवारी मुठभेड़ प्रकरण बिहारक राजनीतिक विमर्शक प्रमुख विषय बनि गेल छल। विपक्षक संग-संग सत्तारूढ़ गठबंधनक किछु नेता सेहो पुलिस कार्रवाई पर प्रश्न उठौने छलाह। सोशल मीडिया पर सेहो निष्पक्ष जांच आ दोषी पर कठोर कार्रवाईक मांग जोर पकड़ने छल।
एखन STF जवानक गिरफ्तारीक बाद जांच एजेंसी घटनाक प्रत्येक पक्षक गहन जांचमे जुटल अछि। जांचक दौरान ई स्पष्ट करबाक प्रयास कएल जा रहल अछि जे गोली कोन परिस्थितिमे चलाओल गेल आ पुलिसक कार्रवाई निर्धारित नियमक अनुरूप छल वा नहि।
