ड्यूटीसँ गायब रहय वला स्वास्थ्यकर्मीकेँ बख्शल नहिं जायत, सभ अस्पतालमे सीसीटीवी कैमरासँ निगरानी

पटना। समदिया

स्वास्थ्य मंत्री निशांत कुमार पटनाक दरियापुर भट्टीमे 1.16 करोड़ रुपयाक लागतसँ बनल शहरी प्राथमिक स्वास्थ्य केंद्रक काल्हि उद्घाटन कयलनि। नगर विकास मंत्री नीतीश मिश्रा आ स्वास्थ्य एवं शहरी विकास विभागक कतेको अधिकारी उपस्थित रहलाह। अस्पतालक उद्घाटनसँ लोक सभ गदगद भ गेल छलाह। निशांत कुमार जहिना यूपीएचसी केर उद्घाटन कयलनि तँ लोक हुनक समर्थनमे नारा लगाबय लगलाह।

₹1.16 करोड़क लागतसँ बनल यूपीएचसी पर काज 6 नवंबर 2024सँ शुरू भेल छल आ आब पूरा भ गेल अछि। काल्हि पूर्णिमा दिन छल। मंत्री निशांत कुमार एहि दिन अस्पतालक उद्घाटन केलथि आ संगहि अपन गृहप्रवेश समारोह सेहो कयलनि। इ शहरी प्राथमिक स्वास्थ्य केंद्र क्षेत्रकें निवासीकें गुणवत्ता आ सुलभ स्वास्थ्य देखभाल सेवा प्रदान करत।

मरीज केर पहिने खुद रजिस्ट्रेशन करय पड़त। एहि लेल रजिस्ट्रेशन रूम बनाओल गेल अछि। आवश्यक दवाईकेँ वितरण लेल एकटा दवाई केर दोकानक व्यवस्था कयल गेल अछि। आँखिक परीक्षण लेल आई लैब आ डॉक्टर लेल कंसल्टेंट रूम बनाओल गेल अछि।

एहि ठाम टीकाकरणक सुविधा सेहो उपलब्ध अछि। एएनसी (प्रेग्नेंसी चेक-अप) उपलब्ध अछि। विभिन्न पैथोलॉजिकल टेस्टक लेल लैबक स्थापना कयल गेल अछि। आवासीय मरीजक इलाजक लेल वार्ड बनाओल गेल अछि।

डाक्टर सभक लेल दूटा डाक्टरक रूम (कोठली) बनाओल गेल अछि। मरीज आ कर्मचारी केर सुविधाक लेल शौचालयक व्यवस्था अछि। एही स्वास्थ्य केंद्रकें स्थापना एकटा परिसरक भीतर मातृ आ बाल स्वास्थ्य सेवा, नियमित टीकाकरण, रोगकें निदान आ उपचार, दवाई वितरण आ प्राथमिक स्वास्थ्य देखभाल सेवाक उपलब्ध करा कय जनताकें बेहतर स्वास्थ्य देखभाल प्रदान करय केर उद्देश्यसँ कयल गेल अछि।

मीडियासँ बात करैत निशांत कुमार कहलनि जे, हम सभ भर्ती पर सेहो विचार कयलहुं अछि आ एखन एहि प्रक्रिया पर काज कय रहल छी। भविष्यमे हम स्वास्थ्य विभागमे कर्मचारीक बहालीक विज्ञापन देब। आइ दू बेड वला अस्पतालक उद्घाटन कयलहुं। एतय सभ किछु ठीक अछि। हमरा सभ लग डाक्टर आ नर्स अछि। हम एहि अस्पतालसँ लोककेँ सेवा देबामे सक्षम छी। एहि ठाम नीक इलाज संभव होएत। एहि ठाम आठटा डॉक्टरकेँ तैनात कयल गेल अछि। एखन दूटा बेड लगाओल गेल अछि, भविष्यमे बेडक संख्या बढ़ा देब।

ओ जानकारी देलनि जे बिहारक पांच जोनमे ट्रॉमा सेंटर बनाओल जा रहल अछि। ई लेवल टू केर  होयत आ 11  ट्रॉमा सेंटर लेवल तीन केर बनाओल जा रहल अछि। हमर प्रयास ई सुनिश्चित करब अछि कि हम जे दवाई उपलब्ध कराबय छि, ओ जनता लेल सुलभ होय। अस्पतालमे सभ तरहक टेस्ट उपलब्ध करेनाइ हमर प्राथमिकता अछि। जल्दिये बिहारक सभ 15 हजार अस्पताल आओर स्वास्थ्य संस्थानमे कैमरा लगाओल जाएत। हम एहन सॉफ्टवेयर तैयार कय रहल छी जे सभ डॉक्टर आ स्टाफक रिकॉर्ड राखत। स्वास्थ्य विभागमे कमांड रूम लगाओल गेल अछि, जतयसँ हम कैमरा पर नजरि राखब। कमांड रूमसँ सब डॉक्टर आ कर्मचारीक उपस्थिति आ अनुपस्थिति पर नजरि राखल जाएत।