राहुल गाँधीक भारत जोड़ो न्याय यात्रा मध्य प्रदेशमे प्रवेश कऽ चुकल अछि। एहि दौरान ओ अईठाम ५ दिन रहताह। मुरैनामे कांग्रेस पीसीसी प्रमुख जीतू पटवारी एहि यात्राक स्वागत कयलनि। एहि दौरान राहुल गाँधी आ जीतू पटवारी एकटा खुजल जीपमे एक सङ्ग बैसल देखल गेलाह। ओतहि राहुल गाँधी मोदी सरकारपर भयंकर हमला करैत कहलनि जे मोदी सरकार अयलाक बाद पाकिस्तानक तुलनामे भारतमे बेरोजगारी दुगुना भऽ गेल।
ग्वालियरमे अपन भारत जोड़ो न्याय यात्राक क्रममे राहुल गाँधी मोदी सरकारपर निशाना साधैत कहलनि, “आइ देशमे पछिला ४० सालमे सबसँ बेसी बेरोजगारी अछि। भारतमे बेरोजगारी पाकिस्तानक तुलनामे दुगुना अछि। आइ हमरा लग बांग्लादेश आ भूटानसँ बेसी बेरोजगार युवा अछि आ एकर कारण नरेन्द्र मोदी छथि किएक तँ ओ नोटबंदी आ जीएसटी लागू कऽ छोट व्यवसायकेँ नष्ट कऽ देने छथि।”
ओ आगू कहलनि, “हवाई चप्पल वालाकेँ हवाई जहाज यात्राक सपना देखा नरेंद्र मोदी ‘गरीबक सवारी’ रेलवेकेँ सेहो हुनकासँ दूर करैत जा रहल छथि। किराया हर साल १०% बढ़ैत अछि, डायनामिक फेयरक नाम पर लूटपाट भऽ रहल अछि। बढ़ैत रद्दीकरण शुल्क आ महग प्लेटफार्म टिकटक बीच लोकसभकेँ एकटा एहेन ‘एलीट ट्रेन’क चित्र देखाकऽ बहलायल जा रहल अछि जाहि पर गरीब लोकनि पैर तक नहिं राखि सकैत छथि।”
