कांग्रेस नेता राहुल गांधी मंगल दिन एक दिवसीय दौरा पर रायबरेलीमे छलथि। एम्हर संसदमे हिन्दू धर्म पर हुनक बयानक विरोधमे एतय पोस्टर लगाओल गेल अछि। पोस्टरमे कांग्रेस नेतासँ एक-दू नहिं बल्कि कतेको प्रश्न पूछल गेल अछि।
पोस्टरमे राहुल गाँधीसँ पूछल गेल छल, “की अहाँकेँ वोट देनिहार हिन्दू मतदाता हिंसक अछि ?” बताउ जे अहाँ कोन धर्मक छी ? रायबरेलीक मतदाता भविष्यमे अहाँकेँ वोट की, गारि देत ?
कांग्रेस जिला अध्यक्ष पंकज तिवारी एहि पोस्टर पर नाराजगी व्यक्त कयलथि अछि। ओ कहलनि जे ई क्षुद्र मानसिकतावला लोकक काज अछि।
हालहिमे कांग्रेस नेता राहुल गाँधी लोकसभामे हिन्दू धर्म पर वक्तव्य देलनि, “जे अपनाकेँ हिन्दू कहैत छथि ओ २४ घंटा घृणा आ हिंसा करैत छथि।“
राहुलक एहि बयान पर पीएम मोदी सदनमे ठाढ़ भेलाह आ विरोध करैत कहलनि, “एहि तरहेँ प्रतिपक्षक नेताक लेल ई उचित नहिं अछि जे ओ पूरा हिन्दू समुदायकेँ हिंसक कहैत छथि।” एहि पर पुनः राहुल गांधी कहने छलथि, “पीएम मोदी आ आरएसएस हिन्दू समाज नहिं अछि। हम ओहि लोकक बात कए रहल छी जे हिन्दू धर्मक नाम पर दिन-राति राजनीति करैत अछि।“
कांग्रेस नेता राहुल गांधी मंगल दिन एक दिवसीय दौरा पर रायबरेली पहुँचल छलथि। ओ अपन यात्राक आरम्भ पूजाक सङ्ग कयलनि। पूजाक बाद ओ भूमऊ गेस्ट हाउस पहुँचलाह, जतय ओ कार्यकर्ता सभसँ भेंट कयलनि। लोकसभा चुनाव जीतलाक बाद ई हुनकर दोसर यात्रा अछि।
एहिसँ पहिने ओ मजदूर सम्मेलनमे भाग लेबाक लेल रायबरेली पहुँचल छलाह। रायबरेली हुनकर माय सोनिया गाँधीक पारम्परिक सीट रहल अछि, मुदा एहि बेर ओ राजस्थान सीटसँ राज्यसभा पहुँचल छथि। एकर बाद लोकसभा चुनावमे कांग्रेस राहुल गाँधीकेँ एहिठामसँ मैदानमे उतारने छल।
