झारखंड उच्च न्यायालय जेपीएससी परीक्षा रद्द करय केर आदेश पर लगेलक रोक
रांची । समदिया
झारखंड हाईकोर्ट हेमंत सोरेन सरकारकेँ पैघ झटका दैत झारखंड लोक सेवा आयोग (JPSC) केर 11म सँ 13म संयुक्त सिविल सेवा परीक्षा आ फूड सेफ्टी ऑफिसर परीक्षा रद्द करबाक राज्य सरकारक आदेश पर तत्काल प्रभावसँ रोक लगा देलक अछि। अदालत राज्य सरकारकेँ 15 दिनक भीतर काउंटर एफिडेविट दायर कऽ अपन पक्ष रखबाक निर्देश सेहो देलक अछि।
मामिलाक सुनवाईक क्रममे हाईकोर्ट सरकारक ओहि आदेश पर स्टे लगा देलक, जाहिमे दुनू परीक्षा रद्द करबाक निर्णय लेल गेल छल। आब राज्य सरकारकेँ संबंधित दस्तावेजक संग 15 दिनक भीतर अदालतमे जवाब दाखिल करबाक होयत।
सफल अभ्यर्थी सभकेँ राहतक आशा
हाईकोर्टक एहि निर्णयसँ दुनू परीक्षामे सफल अभ्यर्थी सभकेँ पैघ राहत भेटबाक आशा बढ़ि गेल अछि। याचिकाकर्ता सभक तर्क छल जे ओ सभ मेहनति आ योग्यताक आधार पर परीक्षा पास कयने छथि आ अनेक अभ्यर्थीक नियुक्ति सेहो भऽ चुकल अछि। किछु अभ्यर्थी सरकारी विभाग सभमे काज शुरू सेहो कऽ देने छथि।
अभ्यर्थी सभक कहब अछि जे जँ परीक्षा प्रक्रियामे कोनो स्तर पर गड़बड़ी भेल अछि, तँ दोषी अभ्यर्थी आ जिम्मेवार लोक सभक विरुद्ध कार्रवाई होयबाक चाही। मुदा एकर खामियाजा सभ सफल उम्मीदवारकेँ नहि भुगतय पड़बाक चाही।
22 भर्ती परीक्षा रद्द करबाक निर्णय छल भेल
उल्लेखनीय अछि जे झारखंडमे भर्ती परीक्षा सभमे कथित गड़बड़ीकेँ लऽ 26 दिनसँ चलि रहल आंदोलन फिलहाल स्थगित भेल छल। प्रदर्शनकारी सभसँ कतेको दौरक बातचीतक बाद राज्य सरकार वर्ष 2014सँ एखन धरि JPSC, झारखंड कर्मचारी चयन आयोग (JSSC) आ एकटा आउटसोर्स एजेंसीक माध्यमसँ आयोजित 22 भर्ती परीक्षा रद्द करबाक निर्णय लेने छल।
एहिसँ अलग सरकार 23 आन परीक्षा सभक जांच करबाक आदेश सेहो देने छल। सरकारक एहि निर्णयक बाद सफल अभ्यर्थी सभमे असंतोष बढ़ि गेल आ करीब 2,000 सफल अभ्यर्थी एकर विरोधमे उतरि गेलाह।
सरकारक निर्णयकेँ हाईकोर्टमे चुनौती
विशेष रूपसँ JSSC संयुक्त स्नातक स्तरीय परीक्षा (JSSC-CGL) केर माध्यमसँ सरकारी नौकरी प्राप्त कयनिहार अभ्यर्थी सभ परीक्षा रद्द करबाक निर्णय पर सवाल उठेलनि। हुनकर कहब छलनि जे जँ परीक्षा प्रक्रियामे गड़बड़ी भेल अछि तँ दोषी लोकक विरुद्ध कार्रवाई होए, मुदा पूरा परीक्षा रद्द कएलासँ मेहनति आ योग्यताक आधार पर चयनित अभ्यर्थी सभ प्रभावित होयताह।
एहि मामिलामे कतेको सफल अभ्यर्थी झारखंड हाईकोर्टक शरणमे गेलाह। याचिका सभ पर सुनवाई करैत अदालत फिलहाल JPSC क 11म सँ 13म संयुक्त सिविल सेवा परीक्षा आ फूड सेफ्टी ऑफिसर परीक्षा रद्द करबाक सरकारक आदेश पर रोक लगा देलक अछि।
आब राज्य सरकारकेँ 15 दिनक भीतर अपन जवाब दाखिल करबाक अछि। एकर बाद मामिलाक अगिला सुनवाई आ हाईकोर्टक अंतिम आदेश पर सभक नजरि बनल रहत।
