राहुल पैलेट गन पीड़ितक संग पहुंलाह थाना, कहलनि – दिल लग फंसल अछि छर्रा, आंखिक रोशनी खतरामे

नई दिल्ली । समदिया

कांग्रेस नेता राहुल गांधी शुक्रकेँ पैलेट गनक कथित पीड़ित साहिल लोचबक संग दिल्लीक संसद मार्ग थाना पहुंचलाह। ओ जंतर-मंतर पर सीजेपीक आंदोलनक दौरान पैलेट गनक इस्तेमालक मामिलामे एफआईआर दर्ज कराबय आ संबंधित अधिकारीसँ जानकारी लेबाक मांग कयलनि। एहि दौरान संसद मार्ग थाना परिसरमे काफी हाई वोल्टेज ड्रामा देखबा लेल भेटल।

पत्रकारसभसँ गप्प करैत राहुल गांधी कहलनि जे 20 जुलाईकेँ कनॉट प्लेसमे पैलेट गनक प्रयोग कयल गेल छल। हुनका अनुसार, साहिलक शरीर पर करीब 200 छर्रा लागल अछि, जाहिमे तीन छर्रा आंखिमे लागल अछि।

राहुल गांधी कहलनि, “एम्सक रिपोर्टमे स्पष्ट रूपसँ लिखल अछि जे हुनकर शरीर मे 200 सँ बेसी छर्रा अछि आ आंखिमे तीन छर्रा अछि। आंखि बुरी तरह क्षतिग्रस्त भ’ गेल अछि आ ओहि आंखिसँ देखबाक क्षमता खतरामे अछि। दिलक बिल्कुल नजदीक सेहो छर्रा फंसल अछि, जकरा छुअल नहि जा सकैत अछि।”

ओ कहलनि जे दिल्ली पुलिसक दिसिसँ कहल गेल अछि जे पुलिस पैलेट गन नहि चलौने छल। एहि पर राहुल गांधी सवाल उठबैत कहलनि जे जँ पुलिस नहि चलौने छल, त’ आखिर ई छर्रा के चलौलक ? हुनकर मांग अछि जे मामिलामे तत्काल एफआईआर दर्ज कयल जाए।

राहुल गांधीक आरोप छल जे भीतरसँ कहल जा रहल अछि जे “ऊपरसँ आदेश” अछि, तेँ एफआईआर दर्ज नहि भ’ सकैत अछि। ओ कहलनि, “जाधरि एफआईआर दर्ज नहि होएत, हमसभ एतयसँ नहि हटब। एहि देशमे लाखों लोकक संग अन्याय होइत अछि। हमर केवल मांग अछि जे एफआईआर, डीडीआर आ जांच अधिकारीक नाम बता देल जाए।”

ओ कहलनि जे साहिलकेँ एक थानासँ दोसर थाना भेजल जा रहल अछि। शुक्रकेँ सबेरे सेहो ओसभ एक थाना गेल छलाह, जतय हुनका दोसर थाना जेबाक लेल कहल गेल। साहिलक वकीलक अनुसार, लोकसभामे विपक्षक नेता राहुल गांधीक पहुंचबाक बाद शिकायत पर रिसीविंगक मुहर लागल, मुदा एखनि धरि एफआईआर दर्ज नहि कयल गेल अछि।

एहि मामिला पर राहुल गांधी सोशल मीडिया प्लेटफॉर्म ‘एक्स’ पर सेहो पोस्ट कयलनि। ओ लिखलनि जे साहिल लोचबक संग भेल कथित पुलिस बर्बरताक खिलाफ एफआईआर दर्ज कराबय ओ संसद मार्गक डीसीपी कार्यालय पहुंचलाह। हुनकर दावा अछि जे 20 जुलाईकेँ जंतर-मंतर पर शांतिपूर्ण प्रदर्शनक दौरान साहिल पर पैलेट गनसँ हमला कयल गेल, जाहिसँ घायल भ’ गेल आ हुनकर एक आंखिक रोशनी खतरामे अछि।

राहुल गांधी कहलनि जे शांतिपूर्ण प्रदर्शनक खिलाफ एहेन कार्रवाई कानूनी कार्रवाई नहि, बल्कि गंभीर अपराध अछि। ओ गृह मंत्री अमित शाह आ प्रधानमंत्री पर सेहो सवाल उठबैत कहलनि जे पीड़ित छात्रसभक संबंधमे कोनो जवाब नहि देल गेल।

राहुल गांधी सोशल मीडिया पर गृह मंत्री अमित शाहसँ सवाल कयलनि, “न्यायसँ एतेक डर किएक ?” ओ दावा कयलनि जे मामिलामे एफआईआर दर्ज होएत आ न्यायिक जांच सेहो कराओल जाएत। हुनका अनुसार, एहि कथित बर्बरताक लेल ऊपरसँ नीचाँ धरि जे कोनो दोषी होएत, ओकर खिलाफ कार्रवाई होएबाक चाही। राहुल गांधी कहलनि जे साहिल आ हुनका जकाँ अन्य पीड़ित छात्रसभकेँ न्याय दियाबय लेल ओ संघर्ष करैत रहताह।