मोतिहारीमे 88 हजारक फर्जी भारतीय मुद्रा संग दू तस्कर बंदी
मोतिहारी । समदिया
भारत-नेपाल सीमावर्ती क्षेत्रमे अवैध तस्करीक विरुद्ध 71म वाहिनी सशस्त्र सीमा बल (SSB) आ बिहार पुलिसक संयुक्त रूपसँ पैघ कार्रवाई कऽ 88 हजार रुपयाक कथित जाली भारतीय मुद्रा बरामद केलक अछि। एहि मामिलामे दू गोट तस्करकेँ गिरफ्तार कएल गेल अछि।
जानकारीक अनुसार, गुप्त सूचनाक आधार पर SSBक 71म वाहिनीक कमांडेंट प्रफुल्ल कुमारक निर्देशनमे अभियान चलाओल गेल। महुअवा सीमा चौकीकेँ सूचना भेटल छल जे मोतिहारीसँ जाली भारतीय मुद्राक एकटा खेप तस्करीक लेल लऽ जाएल जा रहल अछि। एकर बाद SSB आ पूर्वी चंपारणक लखौरा थाना पुलिस संयुक्त रूपसँ नाकाबंदी केलक।
मोतिहारी-लखौरा मुख्य मार्ग पर जांचक दौरान एकटा मोटरसाइकिल पर सवार दू व्यक्ति केँ रोकल गेल। गिरफ्तार लोकक पहिचान चिरैया थाना क्षेत्रक बसवरिया निवासी 38 वर्षीय शेख नूर आलम आ महुअवा निवासी 35 वर्षीय मो. इस्तकारक रूपमे कएल गेल अछि।
मोतिहारी सदर अंचल अधिकारी सुनील कुमारक उपस्थितिमे तलाशी लेल गेल, जतए शेख नूर आलमक कब्जासँ 500-500 रुपयाक कुल 176 संदिग्ध नोट, यानी 88 हजार रुपया, बरामद भेल। प्रारंभिक जांचमे नोटक छपाईक गुणवत्ता फीका पाएल गेल। सभसँ चौंकाबय वाला बात ई रहल जे बरामद कतेको नोट पर एक्कहि सीरियल नंबर अंकित छल।
राति करीब 11:05 बजे पूरा संदिग्ध मुद्रा जब्त कऽ दुनू आरोपीकेँ आगूक कानूनी कार्रवाईक लेल लखौरा थाना पुलिसक हवाले कऽ देल गेल। बरामद नोटक वास्तविक प्रकृति आ नकली होयबाक अंतिम पुष्टि विस्तृत जांचक बाद होएत।
SSB अधिकारीक अनुसार, ई कार्रवाई सीमा पर मजबूत सूचना तंत्र आ स्थानीय पुलिसक संग बेहतर समन्वयक परिणाम अछि। भारत-नेपाल सीमा पर अवैध गतिविधि आ तस्करी पर लगाम लगाबय लेल आगू सेहो लगातार अभियान चलाओल जाएत।
