पीएम मोदी 20 अंतरिक्ष स्टार्टअपक प्रमुखसँ कएलनि भेंट, भारतकेँ वैश्विक अंतरिक्ष प्रौद्योगिकी केंद्र बनेबाक आह्वान

नई दिल्ली । समदिया

प्रधानमंत्री नरेंद्र मोदी शुक्रदिन राष्ट्रीय राजधानी स्थित सेवा तीर्थमे भारतक 20 प्रमुख अंतरिक्ष स्टार्टअपक मुख्य कार्यकारी अधिकारी आ संस्थापकसभसँ बातचीत कएलनि। एहि अवसर पर ओ देशक निजी अंतरिक्ष क्षेत्रक तेजीसँ बढ़ैत क्षमताक सराहना करैत भारतकेँ वैश्विक स्तर पर अंतरिक्ष प्रौद्योगिकीक प्रमुख केंद्र बनेबाक लेल बेसी सहयोग आ नवाचार पर जोर देलनि।

बैठकमे रॉकेट निर्माण, पुनः उपयोग योग्य अर्ध-क्रायोजेनिक प्रक्षेपण यान, उपग्रह तकनीक, वैमानिकी इलेक्ट्रॉनिक्स, उन्नत प्रणोदन प्रणाली, अंतरिक्ष आ रक्षा खुफिया समाधान, अंतरिक्ष मलबा हटेबाक तकनीक तथा आर्टिफिशियल इंटेलिजेंस आधारित मौसम आ जलवायु पूर्वानुमान जेकाँ क्षेत्रमे काज करैत स्टार्टअपक प्रतिनिधि शामिल छलाह।

स्टार्टअप संस्थापकसभ प्रधानमंत्रीकेँ भारतक निजी अंतरिक्ष क्षेत्रमे भेल तीव्र प्रगतिक जानकारी देलनि आ भविष्यक योजना साझा कएलनि। ओ सभ कहलनि जे स्वदेशी तकनीक आ क्षमता विकसित करबाक लेल वर्षोसँ मेहनति आ निवेश कएल जा रहल अछि। अंतरिक्ष क्षेत्रकेँ निजी भागीदारी लेल खोलबाक आ विभिन्न नीतिगत सुधार लेल ओ सभ केंद्र सरकार आ प्रधानमंत्रीक प्रति आभार व्यक्त कएलनि।

उद्योग जगतक प्रतिनिधिसभक अनुसार, सरकारक सहयोग आ कंपनिसभक बीच बढ़ैत भागीदारीक कारण एकटा मजबूत अंतरिक्ष पारिस्थितिकी तंत्र विकसित भऽ रहल अछि। स्टार्टअप प्रमुखसभ कहलनि जे हुनकर टीमसभ पैघ लक्ष्य हासिल करबाक लेल पूरा उत्साह आ प्रतिबद्धताक संग काज कऽ रहल अछि।

प्रधानमंत्री मोदी स्टार्टअप संस्थापकसभक साहस, नवाचार आ पहलक प्रशंसा करैत कहलनि जे निजी कंपनिसभक आत्मविश्वास अंतरिक्ष क्षेत्रकेँ उदारीकृत करबाक सरकारक निर्णयकेँ आरो मजबूत कएने अछि।

ओ कहलनि जे दुनियाक बहुतो देश लग अंतरिक्ष कार्यक्रममे पैघ निवेश करबाक पर्याप्त संसाधन नहि अछि अथवा ओ सभ एहेन निवेशकेँ प्राथमिकता नहि दैत अछि। एहेन स्थितिमे भारतक लेल वैश्विक अंतरिक्ष उद्योगमे अपन स्थिति तेजीसँ मजबूत करबाक एकटा पैघ अवसर अछि।

प्रधानमंत्री अंतरिक्ष क्षेत्रक कंपनिसभकेँ अपन तकनीकक नव उपयोग खोजबाक आ आम लोकक जीवन आसान बनेबऽ वला समाधान विकसित करबाक लेल प्रेरित कएलनि। संगहि, ओ अंतरिक्ष स्टार्टअप आ आन क्षेत्रमे काज करैत कंपनीसभक बीच बेसी सहयोगक आवश्यकता पर जोर देलनि।

ओ सुझाव देलनि जे अंतरिक्ष मलबा प्रबंधन पर काज करैत कंपनीसभ पर्यावरण संरक्षणसँ जुड़ल संस्थासभक संग साझेदारी कऽ सकैत अछि, जाहिसँ एहि तकनीकक व्यापक उपयोग भऽ सकए। तहिना कृषि क्षेत्रसँ जुड़ल अंतरिक्ष प्रौद्योगिकी कंपनीसभ कृषि विश्वविद्यालय आ सरकारी विभागसभक संग मिलि किसानसभकेँ बेहतर निर्णय लेबाक, मौसम संबंधी जानकारी प्राप्त करबाक आ उत्पादकता बढ़ेबामे सहायता कऽ सकैत अछि।