दयानिधि मारनक बयान पर तेजस्वी यादव कयलनि निंदा
पटना
*
डीएमके सांसद दयानिधि मारनक बिहार आ यूपीक जनताक विषयमे विवादित बयानक बाद राजनीति गर्म भऽ गेल अछि। बिहारक उपमुख्यमंत्री तेजस्वी यादव दयानिधि मारनक बयानक निन्दा कयलनि अछि आ एहन बयानसँ बचबाक सलाह देलनि अछि। एहि घटना पर प्रतिक्रिया दैत तेजस्वी यादव कहलनि जे “डीएमके सामाजिक न्यायमे विश्वास करैत अछि। जँ हुनक पार्टीक कोनो नेता बिहार आ यूपीक जनताक विषयमे एहन गप्प करैत छथि तखन ई निन्दनीय अछि। हम एहिसँ सहमत नहिं छी।”
तेजस्वी कहलखिन जे “बिहार-यूपीक लोक भले मजदूर होइ, हर जगह पूरा देशमे ओकर मांग अछि। जँ बिहार आ उत्तर प्रदेशक लोक आन राज्यमे नहि जायत तखन हुनक जीवन ठप भऽ जायत। हम एहन बयानक निंदा करैत छी।”
तेजस्वी कहलनि “नालाक सफाईक बारेमे बयान बिल्कुल उचित नहिं अछि। एहि तरहक बयानसँ सभकेँ बचय केर चाही, चाहे ओ कोनो पार्टीख होइथ।”
ओ कहलनि जे “ई देश एक अछि। हमरासभकेँ प्रत्येक राज्यक लोकक सम्मान करबाक चाही आ आन राज्यक लोकसँ सेहो सम्मानक अपेक्षा करबाक चाही।”
द्रमुक सांसद दयानिधि मारनक बयान पर प्रतिक्रिया दैत बिहार भाजपा अध्यक्ष सम्राट चौधरी कहलनि, “हम लालू प्रसाद आ नीतीश जीसँ जानय चाहैत छी जे दयानिधि मारन जाहि तरहें बिहारक अपमान केलथि, बिहारीक अपमान केलथि, की राष्ट्रीय जनता दल, कांग्रेस पार्टी आ जनता दल यूनाइटेड माफी मांगत। भाजपा आ बिहारक जनता कोनो परिस्थितिमे एहन अपमान बर्दाश्त नहिं करत।”
