केंद्रक संविधान विरोधी सरकार निरंकुश भऽ गेल अछि : मिश्र

मधुबनी जिला कांग्रेस कार्यालयमे भारतीय राष्ट्रीय कांग्रेसक 139म स्थापना दिवस पर कयल गेल झंडोत्तोलन

*

 समदिया मधुबनी

*

भारतीय राष्ट्रीय कांग्रेसक 139म स्थापना दिवस पर जिलाध्यक्ष मनोज कुमार मिश्र दर्जनो पार्टी कार्यकर्ताक उपस्थितिमे जिला कांग्रेस कार्यालय ललित भवन मधुबनीमे पार्टीक झंडोत्तोलन केलैन्ह। एहि अवसर पर जिलाध्यक्ष मिश्र सङ्ग दर्जनो कांग्रेस कार्यकर्ता पार्टी झंडा केर सलामी देलैन्ह। एहि अवसर पर कार्यकर्ता सभकेँ संबोधित करैत जिलाध्यक्ष मिश्र कहलैन्ह जे कांग्रेस पार्टी लेल आजुक दिन गौरवशाली अछि। कियाक त आई पार्टी 138 बरख पूर्ण क 139म बरखमे प्रवेश कयलक अछि। कांग्रेसकेँ देशक आजादीसँ ल’ आधुनिक भारतक निर्माणमे स्वर्णिम इतिहास रहल अछि। कांग्रेस पार्टी आजादीक उपरांत नभ, थल, जल, वायु सभ क्षेत्रमे चतुर्दिक विकास कय एकटा नया आयाम स्थापित कयलक अछि। चाहे ओ इसरो केर स्थापना होय बा भावा एटॉमिक रिसर्च सेंटर, एम्स होय बा आईआईटी, बैंकक राष्ट्रीयकरण होय बा सत्ताक विकेंद्रीकरण। कांग्रेस पार्टी पंचायती राजक स्थापना कय मनरेगा योजना आनि करोड़ो लोककेँ रोजगार देबाक व्यवस्था कयलक। देशमे रेलवे, हवाईअड्डा सनक इन्फ्रास्ट्रक्चरक क्षेत्रमे कतेको तरहक काज कयलक। मिश्र कहला जे देशक विकास लेल कांग्रेस खूब काज कयलक। मुदा, दुर्भाग्यक बात अछि जे केंद्रक सत्तामे बैसल आजुक अहंकारी सरकार विपक्ष मुक्त भारतक सपना देखि रहल अछि। भाजपा केर जुमलाबाज सरकार अलोकतांत्रिक ढंगसँ सभ संवैधानिक संस्था सभकेँ कुचलि कय खत्म करबाक कुत्सित षडयंत्र कय रहल अछि। विपक्षी सांसदकेँ सदनमे अपन बात नहिँ राखए देबए दऽ रहल अछि। इएह कारण अछि हमर देशक जननेता राहुल गांधीकेँ भारत जोड़ो यात्राक उपरांत आब 6200 किलोमीटर केँ भारत न्याय यात्रा करय पड़ि रहल अछि। जाहिसँ गामक गरीब गुरबा आर शोषित वंचित समाजक लोक सभकेँ समान न्याय भेटि सकैए। मुदा, केंद्रमे एहि भाजपा सरकारकेँ रहैत ई कहियो संभव नहिँ अछि। तें केंद्रक अलोकतांत्रिक संविधान विरोधी भाजपा सरकार केर उखाड़ि फेंकबाक आवश्यकता अछि। एहि अवसर पर पार्टीक सभ 21 प्रखंड कांग्रेस कार्यालय पर प्रखंड अध्यक्ष झंडोत्तोलन कय सलामी देलैन्ह।

कार्यक्रममे भाग लेनिहार पूर्व जिलाध्यक्ष ज्योति रमन झा बाबा, पूर्व जिलाध्यक्ष प्रो. शीतलांबर झा, एआईसीसी सदस्य नलिनी रंजन झा रूपम, अधिवक्ता ऋषिदेव सिंह, प्राथमिक शिक्षक संघ प्रधान सचिव महादेव मिश्र, उप महापौर अमानुल्लाह खान, प्रदेश सचिव कृष्णकांत झा गुड्डू, सत्येंद्र पासवान, विजय राउत, युवा कांग्रेस अध्यक्ष शाहिद, किसान सेलक अध्यक्ष अशोक कुमार, राज्य प्रतिनिधि ज्योति झा, जिला सचिव विजय कुमार सिंह, प्रो इस्तियाक अहमद, कुसुम कांत झा, छात्र नेता आलोक, मुकेश कुमार, अविनाश कुमार, प्रफुल चंद्र झा, प्रजापति झा, अनिल चंद्र झा, विश्वनाथ पासवान, विजय कृष्ण झा, विनय कुमार झा सङ्ग दर्जनो कांग्रेसी सभ भाग लय अपन विचार रखलैन्ह।