बिहार सरकारमे मंत्री आ लालू यादवक जेठ बेटा तेज प्रताप यादव अपन बयानक लेल चर्चामे बनल रहैत छथि। आब फेर हुनकर एकटा बयान वायरल भऽ रहल अछि। एकर वीडियो सोशल मीडिया पर कवर कएल गेल अछि। वीडियोमे हुनका ई कहैत सुनल जा सकैत अछि जे राम जी हुनक सपनामे आबि कहलनि जे ओ २२ जनवरीकेँ अयोध्या नहिं आबि रहल छथि।
अपन संस्था धर्मनिरपेक्ष सेवक संघक स्थापना दिवस समारोहमे बिहारक वन आ पर्यावरण मंत्री तेज प्रताप यादव कहलनि, “राम जी हमर सपनामे आयल छलाह। ओ स्वयं हमरा कहलनि जे ओ २२ जनवरीकेँ अयोध्या नहिं अयताह। भगवान राम कहलनि जे ई सब ढोंग कऽ रहल अछि, हम ओहि दिन ऐबे नहिं करब।” तेज प्रताप कहलनि जे भाजपाक लोक धर्म तोड़ि रहल छथि। ओ कहलनि जे जखन चुनाव अबैत अछि तखन मन्दिर आगू आबि जाइत अछि। चुनाव खतम भेला पर मन्दिर केर पूछल नहिं जाइत छैक।
किछु दिन पहिने तेज प्रताप यादवसँ २२ जनवरीकेँ अयोध्या जयबाक विषयमे पूछताछ कयल गेल छल। एहि दौरान तेज प्रताप यादव कहने छलाह जे ओ भगवान कृष्णक भक्त छथि आ ओ वृन्दावन जाइत छथि। मुदा, ओ ई नहिं कहलनि जे ओ २२ तारीखकेँ अयोध्या जयताह वा कि नहिं।
ज्ञात अछि जे प्रधानमंत्री नरेन्द्र मोदी रामललाक प्राण-प्रतिष्ठाक बाद २२ जनवरीकेँ अयोध्यामे राम मन्दिरक उद्घाटन करताह। एहिसँ पहिने ओ सोशल मीडिया पर ५ जनवरीकेँ एहि आयोजनक लेल गाओल गेल स्वागत भजनक जानकारी देलनि। ओतहि प्रधानमंत्री नरेन्द्र मोदीक निर्देश पर भाजपा अयोध्याक राम मंदिरमे होबय बला प्राण-प्रतिष्ठा समारोहक लेल देशव्यापी अभियान चलाबय केर कार्यक्रम तैयार कयलक अछि। भाजपा एकरा लेल पूरा तैयारीमे लागल अछि।
