नीतीश कुमार जँका आब सम्राट चौधरी सेहो शुरू कयलनि ‘जनता दरबार’, समस्याक तुरंत समाधान

पटना। समदिया

बिहारक पूर्व मुख्यमंत्री नीतीश कुमार जँका सम्राट चौधरी सेहो आब जनता दरबार लगौताह। शुक्रदिन (17 अप्रैल, 2026)सँ एकर शुरुआत भ गेल अछि। सम्राट चौधरीक एही कदमसँ ई तँ साफ भ गेल अछि कि ओ पूर्व सीएम नीतीशक परंपराकेँ आगू बढबैत नजरि आबि रहल छथि।

एही जनता दरबारमे बिहारक अलग-अलग जिलासँ फरियादी पहुंचत आ आगू हुनक समस्याक समाधन ऑन द स्पॉट होयत। जनता दरबारमे पहुंचय लेल ऑनलाइन आवेदन करय पडत। 2006मे नीतीश कुमार जनता दरबार कार्यक्रमक शुरुआत कयने छलाह।

दोसर दिस काल्हि (शक्रदिन) विश्वक सबसँ पैघ प्रशासनिक आ सांख्यिकीय अभियान- ‘भारतक जनगणना-2027’ केर सम्राट चौधरी मुख्यमंत्री सचिवालयसँ शुभारंभ कयलनि। एही अवसर पर सम्राट चौधरी राज्यवासीसँ जनगणना प्रक्रियामे सक्रिय आ उत्साहपूर्ण भागीदारी सुनिश्चित करय केर अपील कयलनि।

मुख्यमंत्री कहलनि कि जनगणना सुशासनक आधारशिला अछि। ई आबय वला वर्षमे विकास योजना, नीति आ कल्याणकारी कार्यक्रमक निर्माणमे महत्वपूर्ण भूमिका निभायत। जनगणना-2027 तकनीकी दृष्टिसँ एक ऐतिहासिक पहल अछि। एहीमे पहिल बेर पूर्णतः डिजिटल डेटा संग्रहण आ स्व-गणना (सेल्फ आ एनुमेरशन) केर सुविधा 17 अप्रैल 2026 सँ 01 मई 2026 धरि उपलब्ध रहत।

सम्राट चौधरी कहलनि कि स्व-गणना केर माध्यमसँ वा प्रगणककेँ सहयोग प्रदान कय एक सटीक, समावेशी आ विश्वसनीय जनगणना संपन्न करबायमे अपन सहयोग देल जाय। ‘जनगणना-2027’ बिहार एवं देशक उज्ज्वल भविष्यक दिशामे एक मजबूत आधार तैयार करत।