चुनाव राहुल गाँधी वापस जाउ, रायबरेलीमे कांग्रेस नेताक खिलाफ लागल नारा Maithil Punarjagran Prakash May 20, 2024May 20, 2024 0 Comments रायबरेली * सोमदिन भोरे रायबरेली पहुँचल कांग्रेस नेता राहुल गाँधीक विरोधमे भाजपा कार्यकर्ता सभ ‘राहुल गाँधी वापस जाउ, राहुल गाँधी मुर्दाबाद’ आ ‘जय श्री राम’क नारा लगओलनि। दरअसल, राहुल गांधी चुरुआ मंदिर लग बूथक निरीक्षण करय लेल रायबरेली पहुँचलाह। एहि दौरान हुनका भाजपा कार्यकर्ता सभक विरोधक सामना करय पड़लनि। कांग्रेस सांसद राहुल गांधी सोमदिन रायबरेलीक हनुमान मन्दिरमे पूजा अर्चना कयलनि। तखन ओ कतेको मतदान केन्द्रक निरीक्षण कयलनि। भाजपा रायबरेली सीटसँ राहुल गाँधीक विरुद्ध दिनेश प्रताप सिंहकेँ मैदानमे उतारने अछि। २०१९क लोकसभा चुनावमे भाजपाक स्मृति ईरानीसँ भेटल पराजयक बाद कांग्रेस राहुल गाँधीकेँ अमेठीक बदला रायबरेलीसँ मैदानमे उतारलक अछि, जखन कि अमेठीसँ गांधी परिवारक विश्वासपात्र किशोरी लाल शर्मा पर दांव लगाओल गेल अछि। भाजपा राहुल गाँधीकेँ अमेठीक बदला रायबरेलीसँ चुनाव लड़यबाक लेल कटाक्ष कयलक। भाजपा कांग्रेसक एहि कदमकेँ ई कहि उजागर कयलक कि राहुल स्मृति ईरानीसँ डरैत छथि। राजनीतिक विश्लेषक राहुल गाँधीक अमेठीक बदला रायबरेलीसँ चुनाव लड़बाक कदमकेँ राजनीतिक रूपसँ हुनका लेल हानिकारक बता रहल छथि। रायबरेली राहुलक माय सोनिया गाँधीक गढ़ रहल अछि, मुदा आब ओ राज्यसभाक सांसद बनि गेल छथि। एहनमे राहुलकेँ एहि सीटसँ मैदानमे उतारल गेल अछि। राहुल रायबरेलीक संग-संग वायनाडसँ चुनाव लड़ि रहल छथि। प्रधानमंत्री नरेन्द्र मोदी सेहो पूर्वमे हुनक एहि कदम पर कटाक्ष कयने छलाह।ओ कहने छलाह जे वायनाडक लोक आब राहुलक दोहरा चरित्रसँ अवगत भऽ गेल छथि। Spread the love
