मैथिली रंगमंचक गौरव बढ़ल, मिथिलाक शिव नारायण झा ‘कुणाल’केँ राष्ट्रपति सम्मान
दिल्ली समदिया!! मैथिली रंगमंचक वरिष्ठ नाटककार, निर्देशक आ रंगकर्मी शिव नारायण झा ‘कुणाल’केँ राष्ट्रपति द्रौपदी मुर्मू संगीत नाटक अकादमी पुरस्कारसँ सम्मानित कयलनि। ई सम्मान वर्ष २०२५क ‘Overall Contribution in Theatre’ श्रेणीमे हुनका प्रदान कयल गेल अछि।
राष्ट्रपति भवनमे आयोजित सम्मान समारोहमे शिव नारायण झा ‘कुणाल’ सहित बिहारक तीन प्रमुख कलाकारकेँ सम्मान भेटल। हुनक संग अभिनेता-निर्देशक सुरेश कुमार हज्जू आ मिथिला क्षेत्रीय लोकवाद्य कलाकार महेन्द्र राम सेहो सम्मानित भेलाह। सम्मानस्वरूप ताम्रपत्र, प्रशस्ति-पत्र आ एक लाख टकाक पुरस्कार राशि प्रदान कयल गेल।
*चारि दशकसँ बेसी समयसँ रंगमंचक सेवा*
शिव नारायण झा ‘कुणाल’केँ मैथिली रंगमंचक वरिष्ठतम रंगकर्मीमे गिनल जाइत अछि। उपलब्ध जीवनी-सूचनाक अनुसार हुनक मूल नाम शिव नारायण झा अछि आ हुनक जन्म १९५१ मे मधुबनी जिलाक पालीमोहनमे भेल छल। विज्ञानमे स्नातक कुणाल नाटककार, निर्देशक आ कवि रूपमे मैथिली रंगमंच आ साहित्यक सेवा कयलनि।
मैथिली रंगमंचमे प्रयोगधर्मिता, नवीन नाट्य-शैली आ विशेष रूपसँ कीर्तनिया नाट्य परम्पराकेँ लोकप्रिय बनेबाक क्षेत्रमे हुनक महत्वपूर्ण योगदान मानल जाइत अछि।
*मैथिली रंगमंचक राष्ट्रीय पहचान*
संगीत नाटक अकादमीक ई सम्मान केवल एकटा कलाकारक व्यक्तिगत उपलब्धि नहि, बल्कि मैथिली रंगमंचक राष्ट्रीय स्तरपर बढ़ैत प्रतिष्ठाक सेहो प्रमाण अछि। कुणालक दीर्घ रंगमंचीय यात्रा आ परम्परा तथा नवीन प्रयोगक बीचक सेतुक रूपमे हुनक योगदान मैथिली रंगकर्मक लेल महत्वपूर्ण रहल अछि।
राष्ट्रपति द्रौपदी मुर्मू सम्मान समारोहमे कलाकारसभकेँ भारतीय परम्पराक वाहक आ सामूहिक स्मृतिक संरक्षक बतबैत अगिला पीढ़ीकेँ तैयार करबाक दिशामे व्यवस्थित प्रयास करबाक आह्वान सेहो केलनि।