भ्रष्टाचारीकेँ बख्शल नहिं जाएत : पीएम मोदी

नागाकुर्नूल
*

प्रधानमंत्री नरेन्द्र मोदी शनिदिन कहलनि जे कोनो भ्रष्टाचारीकेँ बख्शल नहिं जायत। ओ भ्रष्ट लोकनिकेँ न्यायक कठघरामे अनबाक लेल तेलङ्गानाक जनतासँ समर्थन माँगलनि। ओ तेलंगानाक नागाकुर्नूलमे एकटा जनसभाकेँ सम्बोधित कऽ रहल छलाह। दिल्ली शराब मामिलामे बीआरएस नेता के. कविताक गिरफ्तारी पर ओ कहलनि जे ओ तेलंगानाक जनतासँ वादा कऽ रहल छथि जे भ्रष्ट लोकनिकेँ बख्शल नहिं जायत। “बीआरएस राज्यक बाहरक अधिकांश भ्रष्ट दलक सङ्ग सेहो साझेदारी कयलक अछि। एकर सच्चाई रोज सामने आबि रहल अछि।” प्रधानमंत्री कहलनि जे “बीआरएस कांग्रेसक नक्शाकदम पर चलि रहल अछि। केसीआर कहैत छथि जे भारतकेँ एकटा नव संविधानक आवश्यकता अछि। की ई बाबा साहेबक अपमान नहिं अछि ?” ओ आरोप लगओलनि जे पूर्व मुख्यमंत्री दलित बन्धु योजनाक माध्यमसँ दलितसभकेँ धोखा देलनि आ तेलंगानाक पहिल मुख्यमंत्री दलित होयबाक अपन वादासँ पाछू हटि गेलाह। प्रधानमंत्री मोदी कहलनि जे पारिवारिक शासनसँ चलि रहल दल मात्र भ्रष्टाचार करत। “कांग्रेस आ बीआरएस घोटालामे भागीदार अछि। कांग्रेस २जी घोटाला कयलक, बीआरएस सिंचाई घोटाला कयलक। दुनू भू-माफियाक समर्थन करैत छथि।” ओ कहलनि जे राज्य दूटा दल – बीआरएस आ कांग्रेसक बीच पीसा रहल अछि। “कांग्रेस आ बीआरएस मिलिकऽ तेलंगानाक विकासक हर सपनाकेँ तोड़ि देलक। आब राज्यपर कांग्रेसक कब्जा अछि। पहिने बीआरएस लूटैत छल आ आब कांग्रेस कऽ रहल अछि।” प्रधानमंत्री मोदी तेलंगानाक जनतासँ अपील कयलनि जे कांग्रेसकेँ रोकबाक लेल भाजपाक नेताकेँ संसदमे पठाओल जाय। “एहि बेर सभ लोकसभा सीट पर भाजपाक कमल फूलबाक चाही। इ हमरा अहांकेँ बढ़िया सेवा करए केर मौका सेहो देत। पछिला चुनावमे तेलंगानामे भाजपाक वोट दुगुना होयबाक चर्चा करैत पीएम मोदी विश्वास व्यक्त कयलनि जे एहि बेर तेलंगाना भाजपाकेँ दू अंकक सीट देत।