प्रसिद्ध गायिका अनुराधा पौडवाल राजनीतिक पारी खेलबाक लेल मैदानमे प्रवेश कयलनि अछि। ओ शनिदिन भारतीय जनता पार्टीमे शामिल भऽ गेलीह। पौडवाल भाजपा महासचिव अरुण सिंह, राष्ट्रीय मीडिया प्रभारी अनिल बलूनी आ अन्य नेताक उपस्थितिमे पार्टीक प्राथमिक सदस्यता ग्रहण कयलनि।
मानल जा रहल अछि जे भाजपा हुनका लोकसभा चुनावमे एकटा महत्वपूर्ण जिम्मेदारी सौंपि सकैत अछि। एकर संगहि पार्टी हुनका स्टार प्रचारक सेहो बना सकैत अछि।
अनुराधा पौडवालक जन्म २७ अक्टूबर १९५४ केँ कर्नाटकक उत्तरा कन्नड़क करवारमे एकटा कोंकणी परिवारमे भेल छल। ओ अपन पहिल गीत १९७३क चलचित्र ‘अभिमान’मे गयने छलीह। अनुराधा पौडवाल ‘आशिकी’, ‘राम लखन’, ‘साजन’, ‘दिल’, ‘दिल है की मानता नहीं’ आ ‘बेटा’ सन फिल्म सहित कतेको बॉलीवुड फिल्मसभमे अपन आवाज देलनि।
वर्ष २०१७ मे अनुराधा पौडवालकेँ पद्मश्रीसँ सम्मानित कयल गेल छल। एकर अतिरिक्त हुनका फिल्मफेयर पुरस्कार आ राष्ट्रीय फिल्म पुरस्कारसँ सेहो सम्मानित कयल गेल अछि। ओ मात्र बॉलीवुड फिल्मसभमे नहिं अपितु अपन आवाजक माध्यमसँ भजन गायनमे सेहो दुनियामे एकटा अलग पहचान बनौने छथि। हिन्दीक अतिरिक्त, ओ गुजराती, पहाड़ी, कन्नड़, तमिल, मराठी, संस्कृत, बङ्गाली, तेलुगु, उड़िया, असमिया, पञ्जाबी सहित कतेको भाषामे गीत गयने छथि।
अनुराधा पौडवाल १५०० सँ बेसी भजन सेहो रिकॉर्ड कऽ चुकल छथि। भाजपामे शामिल भेला पर अनुराधा पौडवाल मीडियाकेँ सम्बोधित करैत कहलनि जे हम विनम्रतापूर्वक प्रसन्न छी जे हम ओहि सरकारमे शामिल भऽ रहल छी जकर सनातनसँ एतेक गहिंर सम्बन्ध अछि। बॉलीवुडमे ३५ साल धरि गयलाक बाद मात्र हम भक्ति गीत गयने छी। ई हमर सौभाग्य अछि जे हम आइ भाजपामे शामिल भऽ रहल छी। एहि दौरान प्रसिद्ध गायिका अनुराधा पौडवाल सेहो भजनक किछु पाँति सुनेलनि।
संगहि अरुण सिंह प्रसिद्ध गायिका अनुराधा पौडवालकेँ भाजपामे स्वागत करैत कहलनि जे आइ प्रधानमंत्री नरेन्द्र मोदी आ भारतीय जनता पार्टीक परिवार पैघ भऽ गेल अछि। देश-विदेशमे जखनो भक्ति गीतक चर्चा होइत अछि तखन अनुराधा पौडवालसँ पैघ कोनो नाम नहिं होइत अछि।
जनतब जे अनुराधा पौडवाल कतेको अवसर पर प्रधानमंत्री नरेन्द्र मोदीक काजक प्रसंशा कय चुकल छथि। २२ जनवरीकेँ अयोध्यामे रामललाक प्राण प्रतिष्ठाक दौरान ओ भजन सेहो गओने छलीह।
