मुख्य निर्वाचन आयुक्त राजीव कुमार मंगल दिन पश्चिम बंगालमे आगामी लोकसभा चुनावक विषयमे किछु महत्वपूर्ण जानकारी देलनि अछि। एकटा संवाददाता सम्मेलनकेँ सम्बोधित करैत ओ कहलनि जे चुनावक दौरान कोनो तरहक हिंसा बर्दाश्त नहिं कयल जायत। चुनावक दौरान हिंसा रोकबाक लेल निर्वाचन आयोग सी विजिल नामक एकटा एप्लिकेशन लाॅन्च करय जा रहल अछि। सी-विजिल यानि सिविलियन टू विजिलैंट अर्थात नागरिकक सतर्कता।
राजीव कुमार कहलनि जे निर्वाचन आयोगक मुख्य उद्देश्य राज्यमे स्वतंत्र, निष्पक्ष आ हिंसा मुक्त चुनाव करब अछि। “चुनावमे भय वा धमकीक कोनो जगह नहिं अछि। नौकरशाहक पक्षपातपूर्ण रवैया बर्दाश्त नहिं कयल जायत। राज्यमे पर्याप्त संख्यामे केन्द्रीय बल सेहो तैनात कयल जायत, जे निष्पक्ष तरीकासँ होयत।”
राजीव कुमार सी-विजिल एप्लिकेशनक विशेषताक विवरण देलनि। ओ कहलनि जे यदि चुनावक लेल कोनो तरहक अनियमितता वा हिंसाक तैयारी कयल जा रहल अछि तखन उपयोगकर्ता एहि एपक माध्यमसँ शिकायत दर्ज करबैत छथि। १०० मिनटक भीतर अपराधीक खिलाफ कारवाई कएल जाएत।
मुख्य निर्वाचन आयुक्त आगू कहलनि जे जँ कोनो उम्मीदवारक आपराधिक पृष्ठभूमि अछि तऽ एहि एपक माध्यमसँ उम्मीदवारक पहचान आ ओकर खिलाफ आपराधिक मामिलाक पहचान कयल जा सकैत अछि। एकर सङ्गहि उम्मीदवारकेँ अपन आपराधिक आरोपक विषयमे तीनटा अखबारमे विज्ञापन प्रकाशित करय पड़त। राजनीतिक दलकेँ सेहो अपन वेबसाइट आ अखबारक माध्यमसँ ई करय पड़त।
राजीव कुमार आगू कहलनि जे आगामी लोकसभा चुनावक लेल किछु मतदान केन्द्र एहेन होयत, जे मात्र महिला द्वारा संचालित कयल जायत। ओहि मतदान केन्द्रपर महिला सुरक्षा बल सेहो तैनात कयल जायत। तहिना किछु मतदान केन्द्रपर पूर्ण रूपसँ दिव्यांग लोकनि द्वारा संचालित होयत। एहिसँ समाजमे एकटा उदाहरण स्थापित होयत जे ओ केकरोसँ कम नहिं छथि।
निर्वाचन आयोगक टीम सोमदिन राजनीतिक दलक प्रतिनिधिसँ भेंट कऽ राज्यमे लोकसभा चुनावक तैयारीक जायजा लेलक। एहि बैसारमे भाजपा आयोगसँ मांग कयलक जे लोकसभा चुनावक दौरान राज्यमे मात्र केन्द्रीय सशस्त्र पुलिस बल (सीएपीएफ) तैनात कयल जाय। भाजपा कहलक जे ई स्वतंत्र आ निष्पक्ष चुनावक लेल आवश्यक अछि।
