थलसेनाध्यक्ष कहलनि “यद्यपि भारत-म्यांमार सीमा पर स्थिति सेहो चिंताजनक अछि आ एम्हर
हम भूटान आ चीनक बीच चलि रहल सीमा वार्तापर बारीकीसँ नजर राखि रहल छी।”
दरअसल, सीमाक बारेमे भूटान आ चीनक बीच बातचीत भऽ रहल अछि। भूटान आ चीनक बीच सीमा विवादमे सेहो डोकलाम शामिल अछि। डोकलाम भारत, चीन आ भूटानक सीमासँ सटल त्रिकोणीय जंक्शन अछि। वर्ष २०१७ मे डोकलामकेँ लऽ कऽ भारत आ चीनक बीच विवाद सेहो भेल छल। दरअसल, डोकलामक क्षेत्र पूर्वोत्तर क्षेत्रक नजदीक पड़ैत अछि जकरा चिकन नेक ऑफ इंडिया कहल जाइत अछि। अतः डोकलामक क्षेत्र भारतक लेल बहुत महत्वपूर्ण भऽ जाइत अछि।
थल सेना प्रमुख जनरल मनोज पांडे बृहस्पतिकेँ कहलनि जे “अग्निवीरक पहिल दू बैच फील्ड यूनिटमे तैनातीक लेल पूर्ण रूपसँ तैयार अछि आ हुनकर प्रतिक्रिया बहुत नीक आ उत्साहजनक अछि। १२० महिला अधिकारीकेँ सेहो कमान भूमिकामे स्थायी कमीशन देल गेल अछि आ फील्ड क्षेत्रमे तैनात कयल गेल अछि। ओ बढ़िया काज सेहो कए रहल छथि।”
आगू कहलनि “भारत-म्यांमार सीमाक स्थिति सेहो हमरा सभक लेल चिन्ताक विषय अछि। पछिला किछु मासमे, म्यांमार सैन्य आ जातीय सशस्त्र सङ्गठनसभक गतिविधिसँ अवगत छी। म्यांमारक किछु नागरिक मिजोरमक सङ्ग-सङ्ग मणिपुरमे सेहो शरण लऽ रहल छथि। चिन्ताजनक बात ई अछि जे भारत-म्यांमार सीमापर किछु विद्रोही समूह दबाव अनुभव कऽ रहल अछि आ मणिपुरमे घुसबाक प्रयास कऽ रहल अछि। हम स्थिति पर नजर राखि रहल छी। असम राइफल्सकेँ एहि बारेमे सतर्क कऽ देल गेल अछि आ सीमाक बाड़केँ मजबूत करबा पर सेहो विचार कऽ रहल अछि।”
जनरल मनोज पांडे आगा कहलनि जे “पछिला साल पूर्वोत्तरक स्थितिमे सुधार भेल अछि आ एकर जिम्मेदार सरकार द्वारा बनाओल गेल नीति अछि। हिंसाक घटना कम भेल अछि। मणिपुरमे पछिला साल मईमे हिंसा भेल छल मुदा राज्य सरकार, सेना आ असम राइफल्सक संयुक्त प्रयाससँ स्थिति स्थिर अछि आ हम सामान्य स्थिति बहाल करबाक लेल काज कऽ रहल छी। जनरल पाण्डेय कहलनि जे हमर देश आर्थिक प्रगतिक पथ पर दृढ़तासँ आगू बढ़ि रहल अछि। हम अपन देशक प्रगतिक लेल आन्तरिक आ बाह्य रूपसँ दुनू मोर्चा पर पुरा तरहसँ स्थायी एवं सुरक्षित माहौल देबय लेल प्रतिबद्ध छी।”
जम्मू-कश्मीरक स्थिति पर सेना प्रमुख कहलनि जे “जहाँ धरि जम्मू-कश्मीरक सवाल अछि, नियंत्रण रेखा पर युद्धविराम चलि रहल अछि, मुदा घुसपैठक प्रयास भऽ रहल अछि, जकरा हम विफल कऽ देने छी। हमसभ एकटा मजबूत ड्रोन-रोधी प्रणाली बनौने छी, जाहिसँ ड्रोनक माध्यमसँ सीमा पार हथियार आ मादक पदार्थक तस्करी नहिं कयल जा सकय। राजौरी आ पुंछ क्षेत्रमे आतंकवादी गतिविधि बढ़ि गेल अछि। हमर उत्तरी सीमा पर स्थिति स्थिर मुदा तनावपूर्ण बनल अछि। हम लगातार बातचीतक माध्यमसँ मुद्दाक समाधानक कोशिश कऽ रहल छी। हमर परिचालन तत्परता बहुत नीक अछि आ तैनाती सेहो नियंत्रित आ विस्तृत अछि।”
