नरेन्द्र मोदी सरकारक दोसर कार्यकालक अंतिम बजट सत्र ३१ जनवरीसँ शुरू होबय जा रहल अछि। सूत्रक अनुसार संसदक आगामी बजट सत्र ३१ जनवरीसँ शुरू होयत आ ९ फरवरी धरि चलबाक सम्भावना अछि। बजट सत्रक शुरुआत ३१ जनवरीकेँ राष्ट्रपति द्रौपदी मुर्मूक अभिभाषणसँ होयत। राष्ट्रपति लोकसभा आ राज्यसभाक दुनू सदनक संयुक्त बैसारकेँ सम्बोधित करतीह। ३१ जनवरीकेँ सरकार दुनू सदनमे आर्थिक सर्वेक्षण सेहो प्रस्तुत करत। बजट सत्रक दोसर दिन १ फरवरीकेँ केन्द्रीय वित्त मंत्री निर्मला सीतारमण अंतरिम बजट प्रस्तुत करतीह। चूँकि ई मोदी सरकारक दोसर कार्यकालक अंतिम बजट होयत आ ओकर बाद सरकारकेँ लोकसभा चुनावक धरातल पर जाय पड़त। एहि लेल कहल जा रहल अछि जे एहि अंतरिम बजट मे मोदी सरकार देशक महिला, किसान, युवा आ गरीबक लेल किछु महत्वपूर्ण योजनाक घोषणा कऽ सकैत अछि या पहिनेसँ चलि रहल योजनाक राशिमे बढ़ोत्तरी करबाक घोषणा सेहो कऽ सकैत अछि। कहल जा रहल अछि जे सरकार किसानकेँ देबयवाला प्रधानमंत्री किसान निधि राशि बढ़यबाक घोषणा सहित कतेको पैघ घोषणा अंतरिम बजटमे कय सकैत अछि।
