कांग्रेस बुधदिन कहलक जे पार्टी अध्यक्ष मल्लिकार्जुन खड़गे विपक्षी गठबन्धन भारतीय राष्ट्रीय विकास समावेशी गठबंधन (इंडिया)क घटक दलक नेतासभक सङ्ग लगातार सम्पर्कमे छथि जाहिसँ हुनका सङ्ग बेहतर समन्वय सुनिश्चित कयल जा सकय।
पार्टी महासचिव जयराम रमेश सेहो कहलनि जे सीट बंटवाराक मुद्दाकेँ बहुत जल्दिये अंतिम रूप देल जायत। कांग्रेसक ई बयान एहि अटकलक बीच आयल अछि जे ‘इंडिया’ गठबंधनक एकटा संयोजक भऽ सकैत अछि आ एहि पदक लेल बिहारक मुख्यमंत्री नीतीश कुमारक नाम प्रमुखतासँ सामने आयल अछि।
किछु मासक बाद होबयवला लोकसभा चुनावमे भारतीय जनता पार्टी (भाजपा)क मुकाबला करबाक लेल ‘इंडिया’ गठबंधनमे २८ दल एक सङ्ग आयल अछि। रमेश कहलनि, “खड़गे जी ‘इंडिया’ गठबंधनक सभ दलक नेताक सम्पर्कमे छथि जाहिसँ ई देखल जा सकय जे बेहतर समन्वय सुनिश्चित करबाक लेल कोना सर्वोत्तम रूपरेखा तैयार कयल जाइत अछि।”
ओ कहलनि जे कांग्रेस अध्यक्ष नीतीश कुमार सहित सभ नेतासँ बात कयने छथि आ गठबंधनक भीतर प्रमुख मुद्दा पर जल्दिये निर्णय लेल जायत। “सभ राजनीतिक दलक संग चर्चा शुरू भऽ गेल अछि। किछु पक्षक सङ्ग वार्ता अन्तिम चरणमे अछि आ किछु पक्षक सङ्ग एखनो प्रारम्भिक चरणमे अछि।”
ओ कहलनि, “पश्चिम बंगालमे टीएमसी आ बिहारमे जनता दल-यूनाइटेड (जेडीयू) केर संग सीट बंटवाराक बातचीत एक-दू दिनमे होए केर उम्मीद अछि। “सीट बंटवारा पर नेताक बीच स्पष्टता अछि। ओ कहलनि जे कांग्रेस नेतृत्व सभ सहयोगी दलकेँ समायोजित करबाक लेल अतिरिक्त प्रयास करबाक लेल प्रतिबद्ध अछि।
दिल्ली प्रदेश कांग्रेस समितिक अध्यक्ष अरविंदर सिंह लवली कहलनि जे आम आदमी पार्टीक सङ्ग सीटक बंटवाराक अगिला दौर १२ जनवरीकेँ होयबाक सम्भावना अछि। कांग्रेस आ आम आदमी पार्टी (आप)क नेता लोकसभाक चुनावक लेल सीटक बंटवारापर चर्चा करबाक लेल ८ जनवरीकेँ एतय बैसार कयलनि आ जोर देलनि जे ओ सभ एकजुट भऽ भारतीय जनता पार्टी (भाजपा)केँ पराजित करत।
