माननीय जिला आ सत्र न्यायाधीश-सह-अध्यक्ष, जिला विधिक सेवा प्राधिकार दरभंगाक निर्देशानुसार नालसाक तहत चलायल गेल देशव्यापी अभियान “रिस्टोरिंग द यूथ-2024” क आलोकमे उपकारा बेनीपुरमे ओरियेन्टेशन कार्यक्रमक आयोजन कयल गेल। कार्यक्रमक अध्यक्षता करैत अवर न्यायाधीश-सह-सचिव, जिला विधिक सेवा प्राधिकार, दरभंगा रंजन देव कहलनि जे जुवेनाइल आरोपीकेँ सामान्य जेलमे नहिं राखल जा सकैछ। ओकरा मुकदमाक विचारणक प्रक्रिया सेहो अलग अछि । जुवेनाइलकेँ चिल्ड्रेन होममे राखल जाइत छै आ ओकर विचारण जुवेनाइल जस्टिसक तहत होइत छैक । हुनकर कहब छलन्हि जे जेलमे बंद कोनो कैदी अपराध करबाक समयमे जौं ओ 18 वर्षसँ कम उम्रक रहैत अछि तऽ ओ अपनाकेँ जुवेनाइल घोषित करेबा लेल आवेदन कऽ सकैत छथि। ऐहन कोनो बंदीक जुवेनाइल घोषित करेबा संबंधित आवेदन कोनो न्यायालयमे जौं लंबित होई तऽ ओहो एहि अभियानक तहत फेरसँ आवेदन कऽ सकैत छथि। सचिव देव आगां कहलनि जे ई अभियान २८ जनवरीसँ १० फरवरी धरि चलायल जायत। जेल विजीटिंग अधिवक्ता विनय कुमार झा ओहि दौरान जेलक बंदी सभसँ मिलिकय जेल पीएलवीक मददसँ आवेदन आ जरूरी कागजात इकट्ठा कय प्राधिकार कार्यालयकेँ देताह । जतयसँ पैनल अधिवक्ता या लिगल एड डिफेंस काउंसिलक माध्यमसँ हुनका उचित विधिक सहायता मुहैया करायल जायत। मौका पर काराधीक्षक धीरज कुमार, जेल विजीटिंग अधिवक्ता सुधा रानी, पैनल अधिवक्ता विनोद कुमार मिश्र, सहायक कुमार गौरव, पीएलवी नितीश कुमार राम आदि मौजूद छलाह।
