१४ जनवरी २०२४ यथा रबि दिन, नवी मुम्बई मैथिल ट्रस्टक तत्वावधानमे पहिल मैथिली वेबसीरीज “नूनरोटी”क सशुल्क प्रीमियर शो आयोजित कराओल गेल, जाहिमे नूनरोटीक आठो एपिसोड देखाओल गेल, संगे संग भगवती गीत पर शास्त्रीय नृत्य, बच्चा सबसँ मैथिलीक शब्द आदि पर प्रश्नोत्तरी आ मैथिली भाषा-संस्कृतिक महत्ता पर व्याख्यान भेल। ई आयोजन, नवी मुम्बई केर जूइनगर स्थित बन्ट्स ऑडिटोरियममे कराओल गेल छल, जाहिमे दर्शकगणक द्वारा ५०० टाकाक सहयोगख शो केर एंट्री पास राखल गेल छल। जनतब होएत जे नूनरोटी मैथिली वेबसीरीजक निर्माण सेहो किछु हद तक क्राउड फंडिंगसँ भेल छल । आम मैथिलजनक सहभागितासँ, कोनो फ़िल्म आदिक एहन शो आयोजित होय केर ई पहिल अवसर छल, जे कि अपना आपमे एकटा प्रायः विशेष प्रयोग छल। दर्शकसँ खचाखच भरल ऑडिटोरियममे मैथिल जनक उत्साह आ उमंग चरम पर रहल। अहि अवसर पर नवी मुम्बई मैथिल ट्रस्टक कार्यकर्ताक संग वरिष्ठ समाज सेवी शुभचंद्र मिश्रा, जय नारायण झा , डॉक्टर अनीश ठाकुर, “नूनरोटी” मैथिली वेबसीरीज केर निर्माता- निर्देशक विकास झा , रौशनी झा आ कलाकार आदर्श भारद्वाज व वरिष्ठ साउंड इंजीनियर शंकर सिंह उपस्थित छलैथ।
