मैथिल समन्वय समिति आयोजित कयलक अपन आठम् वार्षिकोत्सव

मैथिल समन्वय समिति आयोजित कयलक अपन आठम् वार्षिकोत्सव

*

मैथिल समन्वय समिति अपन स्थापनाक आठम् वार्षिकोत्सव मीरा रोड स्थित रश्मि-गार्डेनमे समाजक विशिष्ट व्यक्तिक उपस्थितिमे सोल्लासपूर्वक आयोजित कयलक। समितिक मिडिया प्रभारीक माध्यमसँ जनतब ई जे मैथिल समाजक सेवाक उद्दात व्रत धारण करबाक संकल्प सिद्धिक लेल १४ जनवरी, २०१६ ईस्वीमे समितिक गठन कयल गेल छल। देखैत-देखैत समिति अपन स्थापनाक सफल सात वर्ष पूर्ण कय आठम् वर्षमे प्रवेश कऽ चुकल अछि। एहि सात वर्षक अवधिमे समाजसँ जुड़ल महत्वपूर्ण कार्यक्रम कय समाजक स्नेह प्राप्त करैत आबि रहल अछि। तीन-तीन सफल वर-वधू परिचय सम्मेलन, अपन संस्थापक संयोजक दिवंगत धीरज चन्द्र झाक स्मृतिमे दशवीं/बारहवीं कक्षामे उत्तीर्ण छात्र/छात्राकें समारोहपूर्वक आयोजन करैत “धीरज प्रतिभा सम्मान-पत्र, मोमेन्टो द्वारा सम्मानित करब, नवी मुंबईमे बिजनेस काॅन्क्लेवक आयोजन, दरभंगामे मिथिला रोजगार मेलाक आयोजन आदि प्रमुख रहल अछि।

आठम् वार्षिकोत्सवमे समिति द्वारा मुख्य कार्यक्रममे रक्तदान शिविर तथा पाँच अति विशिष्ट तथा बुजुर्ग समाजसेवी, जिनक योगदान मुंबई प्रवासी मैथिल समाजक लेल वरेण्य एवम् प्रेरणास्पद छन्हि, “प्रेरणा-सम्मान” सम्मानोपधि द्वारा सम्मानित कयल गेलनि। रक्तदानमे बढ़ि-चढ़ि भाग लेनिहारकें सम्मान-पत्र द्वारा सम्मानित कयल गेलनि। प्रेरणा-सम्मान प्राप्त केनिहार डाॅ० गोदावरी झा, शुभ चन्द्र मिश्र, पं० देवलोचन चौधरी, प्रेम चन्द्र झा (प्रेमजी) एवम् उपेन्द्र झाकेँ अंगवस्त्रम्, पाग, प्रशस्ति-पत्र, पुष्प-गुच्छ द्वारा सम्मानित कयल गेलनि। वार्षिकोत्सवमे अहमदाबादसँ शाश्वत मिथिलासँ राजकिशोर झा, संतोष मिश्र तथा नासिकसँ संजय मिश्र उपस्थित भऽ समितिकें उत्साहित करैत कार्यक सराहना कयलनि।

एहि अवसर पर समितिक अध्यक्ष कमल रामविनोद झा आगन्तुक अतिथि-अभ्यागतकें समितिक दिशसँ स्वागत तथा अभिनंदन कयलनि। अपन संबोधनमे कहलनि जे समिति द्वारा रक्तदान शिविरक आयोजन अविस्मरणीय रहल तथा हमरा सभकें प्रेरित कयलक। ललित मिश्र, विनोद साह, संजय राय तथा राकेश कुमार झाक प्रति विशेष आभार व्यक्त कयलनि। सचिव ललित झा’क कहब छलनि जे समिति पूर्ण सामर्थ्यक संग सेवा करबाक प्रति संकल्पित अछि। पूर्वक भाँति जाहि तरहें सहयोग, सुझाव दैत रहलौं तहिना समर्थन दैत रही।

संरक्षक डाॅ० संदीप झा उपस्थित समस्त आगन्तुककें स्वागत करैत आयोजनकें सफल बनेबाक लेल आभार व्यक्त कयलनि। अपन संबोधनमे समाजक प्रत्येक व्यक्तिक जीवनमे सभ प्रकारक उत्थान हेतु एकजुटताक संग सेवा करबाक आह्वान कयलनि। समितिक आगामी कार्यक्रमक विषयमे कहलनि जे मधुबनीमे “द्वितीय रोजगार-मेला – २०२४” आयोजित करेबाक योजना पर विचार-विमर्श चलि रहल अछि जेकर सूचना शीघ्र समाजक समक्ष राखल जायत। समितिक समस्त पदाधिकारीकें शुभकामना दैत उत्साहित कयलनि। समितिक प्रवक्ता राजकुमार झा उपस्थित प्रवासी मैथिल समाजकें प्रति धन्यवाद ज्ञापित करैत अपन भाषा, संस्कृति, संस्कारकें आत्मसात करबाक निवेदन कयलनि।

सांस्कृतिक कार्यक्रम बहुत नीक आर झमटगर भेल। गायक विकास झा अपन गायन प्रस्तुतिसँ उमड़ल जनसमूहकें टससँ मस नहिं होमय देलनि। तहिना स्वाति झा अपन गायन द्वारा सभक आशीर्वाद प्राप्त कय प्रमुदित भेलीह। मंचक संचालन समितिक संयोजक पंकज झा एवम् धनंजय झा संयुक्त रूपें कयलनि। एहि अवसर पर समितिक पेट्रोन सदस्य समेत जयमाधव झा, अंगद चौधरी, भारतेन्दु विमल झा, प्रमोद कुमार झा, आलोक झा (बुलेट), शिवानंद मिश्र, नरसिंह भगत, पंकज ठाकुर, संगीता झा, इन्दू झा, प्रतिभा झा, श्वेता झा, रंजू झा, वी. एन. झा, धर्मेंद्र कुमार झा, के. के. झा, निलेश चौधरी, अरुण चौधरी, अशोक सिन्हा, शंकर झा, शुभ चन्द्र झा, नीलेश झा, संतोष झा, आलोक झा उपस्थित भऽ वार्षिकोत्सवक प्रत्यक्ष गवाह बनला।