मिथिला क्षेत्रीय बिहारक मधुबनी जिलाक छथि मैथिली ठाकुर
*
मधुबनी
*
अयोध्यामे राम मंदिरमे प्राण प्रतिष्ठा कार्यक्रमक लेल पूरा देशमे उत्साह अछि। कलाकार लोकनि सेहो एहि आयोजनकेँ विशेष बनयबामे लागल छथि। एम्हर प्रधानमंत्री नरेन्द्र मोदी बिहारक मिथिलाक बेटी मैथिली ठाकुर द्वारा गाओल गेल एकटा भजनकेँ अपन एक्स हैंडलसँ शेयर कऽ प्रशंसा कयलनि अछि।
लोक गायिका मैथिली ठाकुर द्वारा गाओल गेल ई भजन शबरी आ भगवान श्रीरामसँ जुड़ल अछि। पीएम मोदी एक्स हैंडल पर लिखलनि, “अयोध्यामे प्राण प्रतिष्ठाक अवसर देश भरिक हमर परिवारक सदस्यकेँ भगवान श्रीरामक जीवन आ आदर्शसँ जुड़ल प्रत्येक प्रसंगक स्मरण करा रहल अछि। एहने एकटा भावुक प्रसंग शबरीसँ जुड़ल अछि। सुनू मैथिली ठाकुर जी अपन मधुर धुनमे एकरा कोना गओलनि छथि।”
मैथिली भजनक प्रशंसा करबाक लेल प्रधानमंत्री मोदीकेँ धन्यवाद देलनि अछि। मैथिली मूल रूपसँ बिहारक मिथिला क्षेत्रक मधुबनी जिलाक छथि। ओ हिन्दी, भोजपुरी आ मैथिली सन भाषामे कतेको भजन आ गीत गयने छथि। हिनक भगवान श्रीरामसँ जुड़ल विवाहक गीत खूब पसन्द कयल गेल अछि।
