राहुल गाँधीक मंगल दिनक जातिगत जनगणना करबाबय लेल दबाव बनेबाक वक्तव्य पर बुधदिन मुख्यमंत्री नीतीश कुमार कड़गर प्रतिक्रिया देत कहलनि जे ‘ई सभ फालतूक गप्प’ अछि।
बुधदिन जखन पटनामे संवाददाता लोकनि राहुलक बयानक विषयमे पूछलकनि तखन नीतीश क्रोधित भऽ गेलाह आ कहलनि जे ओ बकवास कऽ रहल छथि। ई बिल्कुल गलत अछि। ओ झूठ श्रेय लए रहल छथि। हम जातिगत जनगणना केलहुं।
ओ कहलनि जे हम नौ दलकेँ बैठक कए एहि पर निर्णय लेलहुं। एकर बाद ओ एहि मामिलामे प्रधानमंत्रीसँ भेंट करबाक लेल सेहो गेलाह। ओकर बाद सभ दलकेँ बजा कए फैसला कयल गेल।
ओ कहलखिन जे हम जातिगत जनगणना कए चुकल छी। जखन ई निर्णय लेल गेल तखन विपक्ष अलग छल।
एहिसँ पहिने कांग्रेस नेता राहुल गांधी पूर्णियामे कहने छलाह जे बिहारक जनताकेँ सामाजिक न्याय देब हमर गठबंधनक जिम्मेदारी अछि आ एकरा लेल हमरा नीतीश जीक जरूरत नहिं अछि।
ओ इहो कहलखिन जे हम हुनका सीधा कहलहुं जे अहांकेँ बिहारमे जातिगत जनगणना करय पड़त। जखनि हम नीतीशजीसँ सर्वे कराबय पर जोर देलौंह तखनि ओ भाजपासँ डरि गेलाह। दबावमे जातीय सर्वे भऽ गेल।
