मिथिला क्षेत्रीय बिहारक लखीसराय जिलामे शनिदिन एकटा सड़क दुर्घटनामे नौ गोटेक मृत्यु भऽ गेल आ पाँच गोटे गम्भीर रूपसँ घायल भऽ गेलाह। ई घटना लखीसरायक रामगढ़ थाना चौक क्षेत्रक झुलौना गाम लग राष्ट्रीय राजमार्ग पर भेल। जानकारीक अनुसार लखीसराय-सिकंदरा मुख्य सड़क पर एकटा ट्रक आ ऑटो रिक्शा आमने-सामने टकरा गेल। टक्कर एतेक भयानक छल जे ऑटो रिक्शाक परखच्चा उड़ि गेल। ऑटो रिक्शामे कुल १४ गोटे छलाह। जाहिमेसँ ८ गोटेक मौकापर मृत्यु भऽ गेल जखन कि एकटा व्यक्तिक उपचारक क्रममे मृत्यु भऽ गेल। शेष गम्भीर रूपसँ घायल लोकक इलाज चलि रहल अछि, जिनकर स्थिति गम्भीर कहल जा रहल अछि।
घटनास्थल पर मौजूद प्रत्यक्षदर्शी अनिल मिस्री कहलनि, “दुर्घटनामे मारल गेल हमर रिश्तेदार मनोज कुमार ऑटो चालककेँ कहलखिन कि किछु लोककेँ हलसीसँ लखीसराय आनय केर अछि। चालक लोकसभकेँ हलसीसँ लखीसराय लऽ आबि रहल छल, एहि बीच रामगढ़ चौक थाना क्षेत्रक झुलौना गाम लग एकटा ट्रक ऑटो रिक्शाकेँ टक्कर मारि देलक।
एहि दुर्घटनामे ऑटोमे सवार सभ १४ गोटे घायल भऽ गेलाह, जाहिमे आठ गोटेक मौकापर मृत्यु भऽ गेल। शेष छओ गोटेकेँ सदर अस्पतालमे भर्ती कयल गेल जतय इलाजक क्रममे एकटा व्यक्तिक मृत्यु भऽ गेल।
गंभीर रूपसँ घायलसभकेँ पीएमसीएच पटनामे रेफर कऽ देल गेल अछि, जतय सबहक हालत बहुत गम्भीर बनल अछि। मृतकक संख्या बढ़बाक संभावना अछि। उक्त घटनाक संबंधमे नगर थानाक मुख्य निरीक्षक अमित कुमार कहलनि जे ई घटना झुलना गाम लग भेल छल। ऑटोमे सवार सभ लोक हलसीसँ लखीसराय आबि रहल छल। हलसीसँ लखीसराय लोक कोन कारणसँ आबि रहल छलाह से पता नहि चलल अछि।
मृतकमे सँ एकटा मुंगेर जिलाक कहल जा रहल अछि, जखन कि एकटा लखीसरायक अछि। मृतकक सभटा परिजनकेँ सूचित कऽ देल गेल अछि। मृतकक परिजन सभ अयलाक बादे ई बात पता चलत जे ई लोक हलसीसँ कतऽ जा रहल छल। उक्त घटना पैघ अछि आ जाँचक बाद उचित कार्रवाई कयल जायत।
