आगामी लोकसभा चुनावक लेल समाजवादी पार्टी आ कांग्रेसक बीच गठबंधन पर अखिलेश यादवक आब गठबन्धन केर लऽ कऽ सकारात्मक बयान सामने आयल अछि। सपा प्रमुख स्वयं कांग्रेसक संग गठबंधनक बात कहलनि अछि।
उत्तर प्रदेशक मुरादाबादमे मीडियासँ बातचीत करैत समाजवादी पार्टीक प्रमुख अखिलेश यादव कहलनि, “अंत भला तऽ सब भला, गठबंधन होएत। सीट बंटवारा पर आब कोनो विवाद नहिं अछि, एकर घोषणा जल्दिये कयल जायत।”
समाजवादी पार्टी छोड़ि भाजपामे शामिल भेल नेतासभ पर ओ कहलनि जे ओ सभ फेरसँ पार्टीमे आबि जयताह। जँ ओ सभ नहि अबैत छथि तखन हुनक विरुद्ध लोकसभ सपामे शामिल होयत।
मानल जा रहल अछि जे सपा आ कांग्रेसक बीच सीट बंटवाराक चर्चा भेल अछि। एकर घोषणा संयुक्त संवाददाता सम्मेलनमे कयल जा सकैत अछि। अखिलेश यादव यूपीमे कांग्रेसकेँ १७ सँ १९ टा सीट दए सकैत छथि।
उत्तर प्रदेशमे लोकसभाक ८० सीट अछि। समाजवादी पार्टी आ कांग्रेसक बीच तीनटा सीटकेँ लऽ कऽ विवाद चलि रहल अछि। सपा मुरादाबाद, बिजनौर आ बलिया सीट कांग्रेसकेँ देबा लेल तैयार नहिं अछि, जकरा लऽ कऽ दुनू दलक बीच गठबंधन पर सहमति नहीं भऽ पाबि रहल अछि। जनतब जे समाजवादी पार्टी २०२४ केर लोकसभा चुनावक लेल अपन ३२ टा उम्मीदवारक घोषणा कय चुकल अछि।
