प्रधानमंत्री नरेन्द्र मोदी आ हुनक यूनानी समकक्ष किरियाकोस मित्सोटाकिस आइ नई दिल्लीमे प्रतिनिधिमण्डल स्तरक वार्ता कयलनि। एहि दौरान पीएम मोदी प्रेस कॉन्फ्रेंसमे यूनानी प्रधानमंत्री आ हुनकर प्रतिनिधिमंडलकेँ स्वागत कयलनि। ओ कहलनि जे १६ सालक बाद यूनानी प्रधानमन्त्रीक भारत आयब एकटा ऐतिहासिक उत्सव अछि।
ग्रीसक प्रधानमंत्रीक भारत यात्रा एकटा ऐतिहासिक उत्सव अछि।
“हम प्रधानमंत्री मित्सोटाकिस आ हुनक प्रतिनिधिमण्डलक भारतमे स्वागत करैत प्रसन्न छी। पछिला साल हमर ग्रीस यात्राक बाद हुनक भारत यात्रा दुनू देशक बीच मजबूत होइत रणनीतिक साझेदारीक संकेत अछि आ १६ सालक बाद ग्रीसक प्रधानमन्त्रीक भारत आयब स्वयं एकटा ऐतिहासिक उत्सव अछि। आइ हमर सभक चर्चा बहुत सार्थक रहल।”
पीएम मोदी आगू कहलनि “हम २०३० धरि द्विपक्षीय व्यापार दुगुना करबाक लक्ष्यक दिस तेजीसँ आगू बढ़ि रहल छी। हम अपन सहयोगकेँ नव ऊर्जा आ दिशा देबाक लेल कतेको नव अवसरक पहिचान कयलौंह अछि।”
मोदी आगू कहलनि “आजुक बैसारमे हम बहुत रास क्षेत्रीय आ अंतर्राष्ट्रीय मुद्दा पर चर्चा कयलहुँ। हम एहि बातसँ सहमत छी जे सभ विवाद आ तनावक समाधान वार्ता आ कूटनीतिक माध्यमसँ होयबाक चाही। हम इंडो-पैसिफिकमे ग्रीसक भागीदारी आ सकारात्मक भूमिकाक स्वागत करैत छी। भारत आ ग्रीस वैश्विक शान्ति आ स्थिरतामे योगदान देबाक लेल अपन प्रयास जारी रखत।”
प्रधानमंत्री मोदी कहलनि जे भारत आ ग्रीसक आतंकवादक विषयमे समान चिन्ता अछि। ओ कहलनि जे एहि क्षेत्रमे दुनू देशक बीच सहयोगकेँ आओर मजबूत करबा पर विस्तारसँ चर्चा कयल गेल अछि। संगहि संग दुनू देश रक्षा उद्योगकेँ जोड़बाक लेल सहमत भऽ गेल अछि।
