कांग्रेस दावा कयलक जे दक्षिणसँ उत्तर दिस अपन पहिल यात्राक दौरान ओकरा भाजपा शासित राज्यसभमे ओतेक समस्याक सामना नहिं करय पड़ल जतेक ओकरा दोसर यात्राक दौरान पूर्वोत्तर राज्यमे सामना करय पड़ि रहल अछि।
कांग्रेसक भारत जोड़ो न्याय यात्रा शुक्रदिन असमसँ गुजरल। एहि दौरान युवा कांग्रेसक गाड़ी पर लक्षित हमला भेल अछि। भारतीय जनता युवा मोर्चा (भाजयुमो) पर शुक्रदिन राति युवा कांग्रेसक गाड़ीमे तोड़फोड़ करबाक आरोप लगाओल गेल अछि। एहि यात्रासँ पहिने लखीमपुरमे राहुल गाँधीक कटआउट आ बैनर सेहो क्षतिग्रस्त भऽ गेल छल। कांग्रेस पुलिसमे शिकायत दर्ज करय केर योजना बना रहल अछि आ भाजपासँ जुड़ल शरारती तत्वक गिरफ्तारीक मांग कऽ रहल अछि।
राहुल गाँधी लगातार दोसर दिन (असमक मुख्यमंत्री) हिमंत बिस्वा शर्माक आलोचना कयलनि आ हुनका देशक ‘सबसँ भ्रष्ट’ मुख्यमंत्री कहलनि। ओ कहलनि, “असमक मुख्यमंत्री एतेक भ्रष्ट छथि जे ओ भाजपा शासित अन्य राज्यमे अपन समकक्षसभकेँ भ्रष्टाचार केना करी, से सिखा सकैत छथि।”
राहुल गाँधीक नेतृत्वमे कांग्रेसक यात्रा १४ जनवरीकेँ मणिपुरसँ प्रारम्भ भेल आ २० वा २१ मार्चकेँ मुम्बईमे समाप्त होयत। पहिल ‘भारत जोड़ो यात्रा’ २०२२-२३ मे कन्याकुमारीसँ कश्मीर धरि आयोजित कयल गेल छल। गाँधी आ हुनक सहयोगी लोकनि भोरमे ब्रह्मपुत्र पर नौका यात्राक सङ्ग जोरहाट जिलाक निमातीघाटसँ दुनियाक सबसँ पैघ नदी द्वीप माजुली धरि ब्रह्मपुत्र पर नाव केर सवारीक संग यात्राक शुरुआत कयलनि। अपन भारत जोड़ो न्याय यात्राक दोसर दिन असममे अपन पहिल जनसभाकेँ सम्बोधित करैत गाँधी दावा कयलनि जे कांग्रेस मूल निवासीक रूपमे संसाधनपर ‘आदिवासी’क अधिकारकेँ मान्यता दैत अछि।
ओ कहलनि “हम अहाँकेँ आदिवासी कहैत छी, जकर अर्थ अछि – जे आदिकालसँ रहि रहल अछि। भाजपा अहाँकेँ वनवासी कहैत अछि, जकर अर्थ अछि वनमे रहयवाला लोक। कांग्रेस नेता आरोप लगौलनि भाजपा आदिवासीकेँ वने तक सीमित राखय चाहैत अछि आ हुनक बच्चाकेँ स्कूल आ कालेज जाय शिक्षा ग्रहण करब, अंग्रेजी सीखब आ कारोबार करय केर अवसरसँ वंचित करय चाहैत अछि।
