पांच राज्यमे भेल विधानसभा चुनावक बादसँ भाजपा तीन राज्यमे अपन सरकार बना चुकल अछि। भाजपा एहि तीनू राज्यमे जे गणित लगा सीएम बनौलक अछि ओ सीधा २०२४क लोकसभा चुनाव साधबाक प्रयासकेँ देखबैत अछि। एहिमे सबसँ खास छल एमपी सीएमक नाम। भाजपा मोहन यादवकेँ एमपीमे सीएम बनौलक। तहियासँ चर्चा चलि रहल अछि जे भाजपा मोहन यादवक माध्यमसँ उत्तर प्रदेश आ बिहार दुनू पर विजय प्राप्त करबाक प्रयास कऽ रहल अछि। एहि क्रममे आब मध्य प्रदेशक सीएम मोहन यादव बिहार दौरा करय जा रहल छथि।
सीएम मोहन यादवक बिहार अयबाक बात पर पटनाक राजनीति सेहो गर्म भऽ गेल अछि। बिहारमे लालू प्रसाद यादव आ तेजस्वी यादवकेँ पूरा यादव समुदाय पर वर्चस्व मानल जाइत अछि। एहनमे मोहन यादवकेँ बिहार अयलासँ भाजपा केर कतेक फायदा होएत, ई तऽ आबय वाला समयमे पता चलत। वर्तमानमे पत्रकार तेजस्वी यादवसँ सीएम मोहन यादवक बिहार यात्राक बारेमे सवाल पूछलनि। एहि पर बिहारक उपमुख्यमंत्री तेजस्वी यादव कहलनि जे “देशमे केकरो अधिकार अछि, कियो कतहु जाए लेल स्वतंत्र अछि। ओहिमे की समस्या अछि ?”
ओना उपमुख्यमंत्री तेजस्वी यादवक इ प्रतिक्रिया सामान्य रहल अछि, मुदा कतहु ने कतहु भाजपा बिहारक यादव समुदायकेँ अपना बनयबाक लेल अपन पहिल कार्ड फेंक देलक अछि। दोसर दिस बिहारक यादव समुदायमे दशकसँ पैठ बनेनिहार लालू परिवारक विश्वसनीयता सेहो एहि बेर दांव पर लागल अछि। यूपीक बात करब तऽ वर्तमानमे यूपीमे भारतीय जनता पार्टीक सरकार अछि, मुदा एतय सेहो यादव समाजक एकटा पैघ वर्ग अखिलेश यादवकेँ समर्थन करैत अछि। एहनमे भाजपा एहि दूनू राज्यक यादव वोट बैंकमे सेंध लगाबयमे लागल अछि। मुख्यमंत्री मोहन यादव १८ जनवरीकेँ पटना आबय वाला छथि।
